Mhux għax qatt kien hemm bżonn ta’ prova, iżda llum kellna konferma, bl-iswed fuq l-abjad, kemm Gvernijiet immexxija mill-Partit Nazzjonalista poġġew pedamenti sodi li l-frott tagħhom qed jitgawda llum. Għalhekk minn qed jipprova jagħti l-impressjoni li dak li għamlu gvernijiet immexxija minn Eddie Fenech Adami u Lawrence Gonzi irid jitwarrab, jew m’għandhux għal qalbu l-Partit Nazzjonalista u jrid jagħmillu biss ħsara, jew inkella maqtugh mir-realtà. L-istorja ewlenija tal-gazzetta The Times of Malta tal-lum hi xhieda ċara ta’ dan: l-impatt tal-attività mill-Malta Freeport fuq l-ekonomija tal-pajjiż din is-sena se tlaħħaq il-107 miljun ewro filwaqt li sal-aħħar ta’ din is-sena mistennija toħloq aktar minn 900 impjieg. Il-Freeport hu frott il-ħidma tal-Partit Nazzjonalista.
L-iżball tal-Partit Nazzjonalista kien li ma tkellemnix biżżejjed bil-ġid kbir li għamel għal pajjiżna. Bħala Kap gdid tal-Partit Nazzjonalista jien se nara li nkomplu, mill-gvern, noħolqu l-ġid kif għamlu l-mexxejja kbar li kellu l-Partit Nazzjonalista mill-gvern, u li jien kelli x-xorti nservi taħthom – Eddie Fenech Adami u Lawrence Gonzi. Dan qalu l-kandidat għal Kap tal-Partit Nazzjonalista Chris Said f’messaġġ lill-kunsilliera, tesserati u attivisti tal-Partit Nazzjonalista.
Chris Said qal, “Ilni tletin sena nservi fil-Partit Nazzjonalista, bħala deputat, imbagħad bħala Segretarju Parlamentari u Ministru. Kburi bil-kisbiet kbar li għamilna għal pajjiżna. Kburi bil-kisbiet kbar li seħħew taħt Eddie Fenech Adami, l-akbar statista li qatt rat il-politika Maltija. Ħasra li ma ftaħarnhiex biżżejjed bil-ġid kbir li ħloqna.”
Chris Said elenka dak li jiddeskrivi veru lill-Partit Nazzjonalista hu dak li għamel u li narawh madwarna kuljum:
· l-Università tal-Qroqq,
· l-MCAST
· l-iskejjel ġodda,
· skejjel tal-Knisja u indipendenti ħielsa,
· l-infrastruttura sportiva
· il-Pixxina Nazzjonali,
· l-Isptar il-ġdid Mater Dei,
· l-Isptar il-ġdid Kontra l-Kanċer,
· it-toroq ewlenin fosthom Triq Reġjonali f’kull parti u mina tagħha,
· it-Terminal tal-Ajruport,
· il-Port Ħieles,
· it-Terminal tal-Cruise Liners,
· il-Port u l-vapuri t’Għawdex,
· il-proġetti vasti u kontinwi bil-flus li ġibna mill-Ewropa bħall-flyover tal-Kappara u Triq il-Kosta,
· ekonomija ħielsa u effiċjenti,
· l-ewro f’butna,
· anqas income tax,
· il-linji tal-ajru low cost,
· l-MCESD għad-djalogu soċjali veru,
· Il-Kunsilli Lokali
· Is-Sħubija ta’ Malta fl-U.E.
Chris Said sostna li dan kollu hu xhieda ta’ nazzjon, modern, Ewropew: it-timbru veru tal-Partit Nazzjonalista. Din hi l-esperjenza – ħidma, twettiq, azzjoni mhux paroli, bżulija, riżultati.
“Hekk beħsiebni nagħmel bħal kap ġdid tal-Partit Nazzjonalista”, temm jgħid Chris Said.
