Il-Moviment Patrijotti Maltin dalgħodu ħarġu jiltaqgħu mal-vapur C-Star li qiegħed jistenna barra mill-ibħra Maltin sabiex ikun jista’ jidħol fil-portijiet tagħna. Fuq il-baħar huma għaddew ix-xorb u l-ikel lil dawn is-17-il persuna li jinsabu mingħajr provvisti abbord dan il-vapur.
Waqt konferenza tal-aħbarijiet, Henry Battistino, il-kelliem għall-Moviment Patrijotti Maltin stqarr li l-Gvern Malti qed iċaħħad liċ-ċittadini Ewropej milli jidħlu fl-ibħra Maltin – xi ħaġa li tmur kontra l-prinċipju fundamentali Ewropew tal-moviment liberu. Hu stqarr li minn dawn is-17-il persuna hemm 9 żgħażagħ Ewropej, u 8 persuni mis-Sri Lanka. Dawn tal-aħħar huma l-ekwipaġġ tad-dgħajsa.
Dan il-vapur kontroversjali bosta jsejħulu wkoll bħala l-“vapur tal-mibegħda”.
Dan hu filmat li tefgħu fuq Facebook dawn l-istess żgħażagħ abbord il-vapur C-Star:
Il-Moviment Patrijotti Maltin qal li l-grupp magħruf bħala Generation Identity, bil-missjoni tagħhom tkun l-imsejħa ‘Defend Europe’ huma ċittadini Ewropej u għandhom id-dritt li jidħlu Malta. F’isem dawn iż-żgħażagħ maqbuda barra mill-ibħra Maltin, huma semmew kif il-missjoni ta’ Defend Europe spiċċat hekk kif issa ilhom aktar minn xahar fuq il-baħar u spiċċawlhom il-provvisti. Kull ma qegħdin jitolbu dawn id-9 żgħażagħ Ewropej hu li jidħlu Malta u minn hemm jaqbdu vjaġġ lura lejn pajjiżhom fl-Ewropa.
Fi kliem Henry Battistino, hu qal: “Il-Maltin ma rrifjutajniex nagħtu l-ilma lil Napuljun meta ġie Malta, u ried jaħkimna – aħseb u ara lill-Ewropej bħalna”.
Meta NET News għamel il-mistoqsijet lill-Moviment Patrijotti Maltin waqt il-konferenza tal-aħbarijiet, huma ma rrispondewx dwar jekk dawn iż-żgħażagħ talbux li jidħlu f’xi port ieħor Ewropew apparti Malta u jekk ġewx irrifjutati, u lanqas ma kienu jafu fejn il-vapur hu rreġistrat u jekk hux irreġistrat f’pajjiż membru tal-Unjoni Ewropea.
NET News ħa l-kumment ta’ Henry Battistino mill-Moviment Patrijotti Maltin:
NET News ħa wkoll il-kumment ta’ Norman Scicluna, kelliem ieħor mill-Moviment Patrijotti Maltin li matul il-vjaġġ tagħhom bid-dgħajsa biex jagħtu l-provvisti lill-vapur C-Star weġġa’ hekk kif waqa’ il-baħar:
