Il-plejer Malti jkompli jagħmel suċċess barra minn xtutna fil-karriera tal-futbol tiegħu – dan hekk kif bis-saħħa tal-gowl ta’ Andre Schembri wassal biex it-tim ta’ Apollon irnexxielu jikwalifika għall-Europa League.
Illejla Apollon Limassol, it-tim Ċiprijott li Andre Schembri jilgħab magħhom, lagħab it-tieni leg kontra t-tim Daniż ta’ Midtjylland. Fl-ewwel leg, it-tim Ċiprijott rebaħ bir-riżultat ta’ 3-2 meta lagħbu f’darhom stess. Madanakollu, kollox deher li sejjer żmerċ hekk kif illejla ġewwa d-Danimarka, kienu Midtjylland li ħadu l-vantaġġ b’gowl fl-għaxar minuta. Iżda hawnhekk kien il-Malti Andre Schembri li salva lit-tim Ċiprijott u ġab il-gowl tad-draw – biex b’hekk Apollon Limassol għaddew għal fażi tal-gruppi tal-Europea League.
Fiċ-ċelebrazzjonijiet tal-kwalifikazzjoni tat-tim, Andre Schembri fuq Facebook tefa ritratt ma’ sħabu tat-tim waqt li kien liebes l-imnieħer aħmar ta’ Dr Klown – fondazzjoni li tgħin lit-tfal fl-isptarijiet f’Malta.
