RITRATTI: Turija oħra ta’ forza mill-Amerikani fil-Korea

Għal darb’oħra l-militar Amerikan għamel turija ta’ saħħa fuq il-Korea t’Isfel wara l-isparar ta’ missila mill-Korea ta’ Fuq. Missila li għaddiet minn fuq territorju Ġappuniż u waslet għal skambju ieħor ta’ theddid bejn l-Istati Uniti u l-Korea ta’ Fuq.
Il-Ministeru tad-Difiża tal-Korea t’Isfel, qal li żewġ bombers tat-tip B-1B u żewġ ajruplani tat-tip F-35 Amerikani ħadu sehem f’manuvri ma’ ajruplani tat-tip F-15 tal-Korea t’Isfel. Fihom ipparteċipaw ukoll ajruplani F-15 Ġappuniżi.
Titjiriet simili saru komuni hekk kif tiżdied it-tensjoni fil-peninsola Koreana, li teknikament hi fi stat ta’ gwerra peress li l-gwerra Koreana tal-1950-53 intemmet b’armistizju biss u mhux trattat ta’ paċi.
L-ajruplani B-1B telqu mill-bażi tal-ajru ta’ Andersen f’Guam filwaqt li l-F-35 telqu mill-bażi Amerikana f’Iwakuni fil-Ġappun.(Ritratti:EPA-EFE/SOUTH KOREA AIR FORCE)