Baqa’ issa l-aħħar ftit ġranet biex it-tesserati tal-Partit Nazzjonalista eliġibbli biex jivvutaw fl-elezzjoni ta’ nhar is-Sibt li ġej, ikunu jistgħu jiġbru d-dokument tal-vot mid-Dar Ċentrali f’Tal-Pietà. Filfatt, id-dokumenti tal-vot jistgħu jinġabru llum it-Tlieta sas-18:00, għada l-Erbgħa bejn id-09:00 u t-20:00, u l-Ħamis bejn id-09:00 u s-18:00.
Sal-bieraħ filgħaxija, kienu nġabru mal-11,000 dokument tal-vot, li 2,596 minnhom diġà vvutaw fl-elezzjoni bikrija ta’ nhar is-Sibt li għadda. Il-kumplament se jkunu jistgħu jivvutaw nhar is-Sibt li ġej bejn it-08:00 u d-21:00 fuq il-Fosos tal-Floriana jew l-MFCC Ta’ Qali, u bejn it-08:00 u t-20:00 fis-Subheadquarters tal-Partit Nazzjonalista f’Ta’ Sannat, Għawdex.
