Illum kompla l-ġbir tal-voti għall-elezzjoni ta’ Kap tal-Partit Nazzjonalista nhar is-Sibt li ġej. Illum inġabru 1,516 biex b’hekk l-ammont ta’ dokumenti tal-voti miġbura s’issa hu ta’ aktar minn 12-il elf.
Dawk it-tesserati li huma intitolati biex jivvutaw f’din l-elezzjoni għada jistgħu jiġbru d-dokument tal-vot mid-Dar Ċentrali tal-Partit Nazzjonalista f’Tal-Pietà bejn id-9:00am u t-8:00pm u l-Ħamis bejn id-9:00am u s-6pm.
Kull min ilu tesserat tal-Partit Nazzjonalista għal aktar minn sentejn u f’mill-inqas waħda mill-aħħar ħames snin kellu s-sħubija aġġornata, għandu d-dritt li jivvota fl-elezzjoni ta’ nhar is-Sibt li ġej. Jekk dawn il-persuni ma ħallsux it-tessera tal-aħħar sentejn, huma obbligati li jagħmlu dan, sa mhux aktar tard minn għada fis-6.00pm, biex jinħarġilhom id-dokument tal-vot. Kull min hu membru għal għomru, ovvjament, jikkwalifika biex jivvota fl-elezzjoni ta’ nhar is-Sibt li ġej.
Bħalissa, ż-żewġ kandidati għall-elezzjoni qed ikomplu għaddejjin bil-kampanji elettorali tagħhom, li mistennija jilħqu l-qofol tagħhom waqt id-dibattitu ta’ nhar il-Ħamis li ġej fid-9:00pm. Il-Konvenzjoni Ġenerali tiftaħ il-Ġimgħa fis-7:30pm fid-Dar Ċentrali fejn mistenni jagħmel l-aħħar diskors tiegħu bħala Kap tal-Partit Nazzjonalista Simon Busuttil.
L-elezzjoni nhar is-Sibt tkun miftuħa bejn it-8:00am u d-9:00pm fuq il-Fosos tal-Floriana u l-MFCC Ta’ Qali, kif ukoll bejn it-8:00am u t-8:00pm fis-Subheadquarters tal-Partit Nazzjonalista f’Ta’ Sannat, Għawdex.
Wara l-votazzjoni s-Sibt, jibda mill-ewwel il-proċess tal-għadd tal-voti fuq il-Fosos tal-Floriana. Il-media tal-Partit Nazzjonalista se tkun qed twasslilkom dan il-proċess b’mod dirett, b’aġġornamenti kontinwi u bl-aħħar żviluppi.
