Illum, Malta ser tospita t-tlettax-il-laqgħa tal-Grupp Arraiolos. Dan huwa forum annwali ta’ Presidenti Ewropej mhux eżekuttivi. L-Edizzjoni Maltija tal-laqgħa tal-grupp Arraiolos ser tkun l-ikbar waħda. Dan għaliex ser jkunu qed jipparteċipaw tlettax-il President, u għall-ewwel darba ser jipparteċipaw tlett Presidenti Ewropej nisa.
Din l-inizjattiva taf il-bidu tagħha fl-2003, fil-villaġġ Portugiż ta’ Arraiolos, permezz tal-Eks President tal-Portugal, L-E.T. Jorge Sampaio. Minn dak iż-żmien, din il-laqgħa kompliet tikber u tevolvi, kemm fid-daqs, kif ukoll fl-iskop tagħha. Dan il-forum jipprovdi pjattaforma li, permezz tagħha, il-Presidenti Mhux Eżekuttivi tal-Unjoni Ewropea, jesploraw it-tħassib kurrenti li jkun qed jiżviluppa u li jkunu qed jiffaċċjaw il-popli Ewropej.
It-tema għall-laqgħa ta’ din is-sena ‘Crossing Borders’, hija stedina għall-Presidenti parteċipanti biex nirrifflettu fuq kif l-Ewropa għandha terġa tiskopri l-valuri soċjali ewlenin tagħha. Arraiolos 2017 hija wkoll opportunita’ għall-Presidenti mhux eżekuttivi tal-Unjoni Ewropea, sabiex jagħtu aktar viżibilita’ lil temi partikulari li qed jiġu ffaċċjati mill-kommunitajiet tagħna, mis-soċjetajiet tagħna u mir-reġjuni tagħna.
Is-sena 2017 qed tfakkar ukoll is-60 Sena Anniversarju tal-iffirmar tat-trattati ta’ Ruma, li fuqhom nbniet l-Unjoni Ewropea. Nemmen li huwa tassew essenzjali li aħna, bħala Presidenti, nużaw dan il-forum biex niddiskutu d-dimensjoni soċjali tal-Ewropa, u biex nkomplu naħdmu favur l-inklużjoni u l-parteċipazzjoni fl-Unjoni Ewropea.
Jien konvinta li, bħala Presidenti, ser nkunu qed niffokaw l-attenzjoni tagħna fuq aspetti importanti tal-ġustizzja soċjali, fosthom il-fenomenu tal-immigrazzjoni, strateġiji għall-inklużjoni soċjo-ekonomika, u l-bżonn li nrawmu proċessi ta’ parteċipazzjoni demokratika, għall-ġid taċ-ċittadini u tar-residenti tal-pajjiżi tagħna.
Meta niffokaw fuq dawn l-isfidi kumplessi, nkunu qed naħdmu sabiex niżviluppaw djalogu profond billi, fuq naħa, nogħlew ‘il fuq mid-differenzi ta’ bejnietna, u fuq in-naħa l-oħra, nkunu qed noħolqu opportunitajiet ġodda ta’ ħbiberija u rispett reċiproku.
L-importanza li nindirizzaw it-tensjonijiet soċjali u l-inċertezzi politiċi li ħafna pajjiżi qed jiffaċċjaw, u li jimmanifestaw rwieħhom f’ħafna modi, ma tistax tiġi njorata. Hawnhekk nikkwota l-kliem ta’ ispirazzjoni ta’ Nelson Mandela li qal li “l-edukazzjoni hija l-iktar arma b’saħħitha li inti tista’ tuża biex tbiddel id-dinja.”
Għal din ir-raġuni, jien nemmen li, l-ewwel irridu nassiguraw sistema edukattiva ekwa, permezz tal-promozzjoni ta’ sistemi edukattivi inklussivi fl-Unjoni Ewropea. Dawn l-istrateġiji għall-edukazzjoni nklussiva fit-tul, jridu jseħħu flimkien ma’ aktar investiment lejn miżuri ta’ taħriġ mmirati lejn żgħażagħ u ħaddiema bi ftit ħiliet.
Fl-Unjoni Ewropea għad hemm mal-ħdax-il miljun ruħ li ilhom bla xogħol għal aktar minn sena. Din iċ-ċifra titlob azzjoni effettiva.
Il-ħtieġa għal policies ta’ kura tas-saħħa sostenibbli u ta’ kwalita’ għolja,trid tiġi enfasizzata wkoll. Dan biex jiġi assigurat li, l-maġġoranza tal-popolazzjoni jkollha aċċess għas-servizzi li jtawlu l-ħajja u jtejbu l-kwalita’ tal-ħajja, bl-inqas spiża possibbli.
Is-soluzzjoni f’dawn l-oqsma kollha m’għandiex tkun soluzzjoni ta’ “one-size-fits-all.” Nemmen li biex nindirizzaw il-problemi li qed jeffettwaw lill-pajjiżi tagħna, jeħtieġ li nrawmu sens ta’ solidarjeta’ bejn il-ġnus u l-popli tagħna. Strateġiji innovattivi u l-qsim ta’ prattiċi siewja, għandhom jkunu ta’ prijorita’.
Fil-ħidma tagħna kontra l-faqar, huwa essenzjali li l-faqar fost it-tfal jingħata prijorita’ mill-istati membri kollha tal-Unjoni Ewropea. Skond statistika maħruġa s-sena l-oħra fis-‘Social Justice in the EU Index Report,’ 26.9% tat-tfal u ż-żgħażagħ kollha fl-Unjoni Ewropea, jinsabu f’riskju ta’ faqar jew esklużjoni soċjali. Appoġġ finanzjarju permezz ta’ benefiċċji: bħal benefiċċju tal-housing, benefiċċji għat-tfal, rebate fuq it-taxxa għall-familji, u miżuri oħra, jridu jkunu effettivi flimkien ma’ investiment fl-edukazzjoni u fis-suq tax-xogħol.
Sadanittant, sfortunatament, id-dinja qed tara żieda f’diskors popolista aggressiv. Anke f’demokraziji li ilhom stabbiliti, u f’pajjiżi liberali, qed ikollhom jiffaċċjaw dan it-theddid. Din is-sitwazzjoni hija aggravata aktar fil-kuntest tal-immigrazzjoni, b’mod partikolari fir-Reġjun Ewro-Mediterranju tagħna.
Studji bħar-rapport riċenti mill-Organisation for Economic Cooperation and Development, jindikaw, bl-aktar mod ċar, li l-immigranti jammontaw għal 70% taż-żieda tal-ħaddiema Ewropej, tul l-aħħar għaxar snin. Dan juri li l-immigranti huma kontributuri effettivi għall-pajjiżi tagħna, fil-kontribut tagħhom f’taxxi u kontribuzzjonijiet soċjali, aktar milli benefiċjarji ta’ benefiċċji.
Dan l-istess rapport jistqarr li, l-immigrazzjoni qed isaħħaħ ukoll id-demografija, partikolarment fid-dawl tal-ageing population fl-Ewropa, u fid-dawl ta’ sistemi ta’ pensjonijiet u welfare li mhumiex sostenibbli.
Għaldaqstant, is-sejħa għall-ħolqien ta’ fruntieri hija strateġija soċjalment perikoluża u ekonomikament riskjuża.
Diversi studji juru wkoll, li livelli għolja ta’ ġustizzja soċjali jwasslu għal prosperita’ ekonomika akbar. Dan ifisser li żieda fl-inugwaljanzi għandha impatt negattiv fuq it-tkabbir ekonomiku fit-tul, u għalhekk, jeħtieġ li din iż-żieda tiġi indirizzata b’mod ħolistiku, biex it-tibdil soċjali u ekonomiku iseħħ flimkien.
Il-laqgħa tal-Grupp Arraiolos hija pjattaforma li permezz tagħha ser nippromovu aktar kollaborazzjoni u solidarjeta’. F’dan il-kuntest, hija l-fehma tiegħi li ma’ nistgħux naħsbu biss fuq implimentazzjoni ta’ globalizzazjoni ekonomika, mingħajr ma’ ninvestu f’sistemi ta’ solidarjeta’ soċjali u globali.
Għaldaqstant, nistenna bil-ħerqa r-riżultat mil-Laqgħa tal-Grupp Arraiolos, li nispera li tinfluwenza effett pożittiv fil-ħajja tal-popli kollha tagħna.
