15,527 tesserat tal-Partit Nazzjonalista ġabru d-dokument tal-vot u għalhekk huma eliġibbli biex jivvutaw fl-elezzjoni ta’ Kap tal-Partit Nazzjonalista. Minn dawn, 2,595 diġà vvutaw fl-elezzjoni bikrija li saret nhar is-Sibt li għadda. Il-kumplament, jiġifieri 12,932 jistgħu jivvutaw matul il-ġurnata ta’ għada s-Sibt f’dawn il-ħinijiet:
- Fuq il-Fosos tal-Floriana bejn it-08:00 u d-21:00.
- L-MFCC, Ta’ Qali bejn it-08:00 u d-21:00.
- Is-Subheadquarters tal-Partit Nazzjonalista f’Ta’ Sannat Għawdex bejn it-08:00 u t-20:00.
Fil-votazzjoni ta’ għada, t-tesserati għandhom jagħżlu l-preferenza tagħhom bejn iż-żewġ kandidati għall-elezzjoni ta’ Kap tal-Partit Nazzjonalista Adrian Delia u Chris Said.
