Ikompli l-paniku fir-reġjun tal-Karibew, hekk kif l-Uragan ġdid Maria qed ikompli javvanza u jħalli aktar ħsarat katastrofiċi. Pereżempju fil-Gżira ta’ Dominika, il-Prim Ministru Roosevelt Skerrit kiteb fuq Facebook li l-qerda tant hi qawwija li l-poplu tilef kollox.
L-Uragan Maria żdied fil-qawwa fl-aħħar ħinijiet, bil-potenzjal tiegħu qed jitqies bħala mill-aktar devastanti. Dan qed javvanza mill-istess direzzjoni tal-Uragan Irma, bi rwiefen li qed jonfħu b’qawwa konsistenti ta’ 250 kilometru fis-siegħa u bl-elementi jistgħu jsiru aktar ħorox.
Fl-aħħar sigħat, l-awtoritajiet fil-gżira ta’ Dominika ħejjew għal stat ta’ emerġenza, fost l-impenji ta’ għajnuna medika għall-persuni midruba mill-elementi. Il-Prim Ministru talab ukoll l-għajnuna lill-komunità internazzjonali, bil-Portijiet u l-Ajruporti tal-Gżira jingħalqu u r-residenti qrib il-kosta ordnati biex jiġru lejn ix-‘shelters’ fiż-żona.
