Stennija għall-ewwel diskors mill-Kap il-ġdid tal-Partit Nazzjonalista Adrian Delia waqt meeting li se jsir illejla. Dan hekk kif illejla jsir il-meeting annwali fl-okkażjoni tal-Festi tal-Indipendenza, organizzati mill-Partit Nazzjonalista.
Ilbieraħ, waqt attività politika taħt it-tinda, Adrian Delia qal li kien għadu ma ħejjiex id-diskors tiegħu peress li ried iqatta’ tlett ijiem jiltaqa’ u jisma’ lin-nies.
Intant, wara d-diskors tiegħu quddiem il-folla li mistennija tinġabar fuq il-Fosos tal-Furjana, il-Kap tal-PN hu mistenni li jmur jiltaqa’ man-nies li llejla se jkunu qed jissieħbu fil-Partit Nazzjonalista permezz ta’ tinda apposta tat-tesserament fuq il-Fosos.
Wara, għall-ħabta ta’ nofsillejl, tittella’ l-bandiera ta’ Malta fuq il-palk ewlieni, fl-isfond tad-daqq tal-Innu Malti biex b’hekk jiġu fi tmiemhom l-attivitajiet organizzati mill-Partit Nazzjonalista fl-okkażjoni tal-Indipendenza.
