Is-Segretarju tal-Istat Amerikan, Rex Tillerson, qal li l-Istati Uniti tinsab ‘f’kuntatt dirett’ mal-Korea ta’ Fuq komunista u li Washington qed ‘jinvestiga’ l-possibbiltà ta’ taħditiet mar-reġim ta’ Pyongyang.
Tillerson kompla li ‘kulħadd għandu jsegwi l-iżviluppi’ waqt li hu kien għaddej bi żjara fiċ-Ċina. Hu qal li ‘s-sitwazzjoni mhix daqstant mudluma’ u li jeżistu linji ta’ komunikazzjoni mar-reġim tal-Mexxej Korean komunista, Kim Jong-un.
L-Istati Uniti u l-Korea ta’ Fuq, fl-aħħar jiem u ġimgħat, infexxew f’diskors aggressiv u ‘perikoluż’ kontra xulxin, iżda din hi l-ewwel darba li ġew żvelati l-imsemmija ‘linji ta’ komunikazzjoni bejniethom’.
Aktar tard illum, id-Dipartiment tal-Istat Amerikan aċċenna għall-fatt li hemm ‘il-mezzi ta’ komunikazzjoni miftuħa ma’ Pyongyang’, iżda qal ukoll li, għalissa, ma sarx il-progress mixtieq.
‘Minkejja li ngħataw l-assikurazzjonijiet li l-Istati Uniti mhix interessata f’li tippromwovi l-kollass tar-reġim fi Pyongyang, l-uffiċjali fil-Korea ta’ Fuq ma indikawx li huma interessati, jew huma lesti, għal taħditiet rigward id-denuklearizzazzjoni’, qalet Heather Nauert, kelliema għad-Dipartiment tal-Istat Amerikan.
L-Istati Uniti trid li l-Korea ta’ Fuq tirtira mill-programm għall-iżvilupp tal-armi fejn, permezz tiegħu, ippruvat sensiela ta’ provi għall-missili, kif ukoll għall-materjal nukleari. Prova partikulari kienet għal bomba tal-idroġenu li kapaċi tkun stallata fuq missila li twassal fit-tul u li l-kelliema ta’ Pyongyang qalu li ‘irnexxiet’.
Fl-istess ħin, it-tentattivi għal djalogu mal-Korea ta’ Fuq qed jidhru ferm differenti mill-attitudni tal-President Amerikan Donald Trump fir-rigward tal-kriżi – bi Trump innifsu jtenni, ix-xahar li għadda, li ‘id-djalogu ( ma’ Pyongyang) ma joffri l-ebda soluzzjoni’.
