Mara ssofri ġrieħi ta’ natura gravi, wara li seħħ inċident bejn trakk tal-irmonk u karozza fil-limiti taż-Żejtun.
Għall-ħabta tat-tmienja ta’ filgħodu, seħħ inċident stradali f’Bulebel fejn trakk tal-irmonk tat-tip Iveco Daily misjuq minn raġel ta’ 42 sena li hu residenti l-Birgu, u karozza oħra tat-tip Maruti 800 misjuqa minn mara ta’ 55 sena residenti Ħaż-Żabbar.
Il-mara li kienet qed isuq il-karozza sofriet ġrieħi u għaldaqstant fuq il-post issejħet ambulanza li ħaditha l-Isptar Mater Dei għall-kura neċessarja. Iktar tard, hija ġiet iċċertifikata li qiegħda ssofri minn ġrieħi ta’ natura gravi.
L-investigazzjoni tal-Pulizija dwar dan l-inċident għadha għaddejja.
