Fil-programm speċjali Xarabank ta’ nhar il-Ġimgħa, ħareġ mhux biss l-element politiku mill-intervista ma’ Adrian Delia, iżda l-poplu Malti seta’ wkoll isegwi l-ħajja ta’ wara l-kwinti tal-Kap il-ġdid tal-Partit Nazzjonalista flimkien mal-familja tiegħu.
Filfatt għal dan il-programm, kienet mistiedna l-mara ta’ Adrian Delia – Nickie Vella de Fremeaux, li b’ton umoristiku qasmet il-ħsibijiet li kienu għaddejjin minn moħħa u l-eċitament tal-ħamest itfal tagħhom waqt il-ġurament tal-ħatra tal-Kap tal-Oppożizzjoni. L-avukat Nickie Vella de Fremeaux qalet li waqt il-ġurament, moħħa kien fit-tfal hekk kif tant kienu eċitati li bdew jifirħu u jaqbżu bil-ferħ. “Qisni qed ngħix f’ħolma, għadni lanqas naf x’laqatni”, tenniet Nickie Vella de Fremeaux.
Aktar tard matul il-programm, intweriet silta fejn it-tim ta’ Xarabank għamel ġurnata mal-familja Delia – fejn tibda bil-kolazzjon, kompliet bil-qadi tad-dmirijiet tal-Kap tal-Partit Nazzjonalista Adrian Delia, u wara BBQ fil-dar tal-familja kollha miġburin.
Iżda l-programm ħa xeħta aktar personali, meta Adrian u Nickie flimkien bdew jirrakkuntaw kif iltaqgħu u kif żvolġiet l-imħabba bejniethom – sakemm fl-aħħar intwerew ukoll siltiet mit-tieġ tagħhom:
Biex ikompli mal-atmosfera ta’ ferħ u brijju li ġab dan il-programm miegħu – ma naqasx li l-programm jingħalaq bid-diska favorita tal-Kap tal-Partit Nazzjonalista u l-mara tiegħu – ‘Xemx’.
