Erba’ plejers tat-tim nazzjonali ngħaqdu mal-kampanja nazzjonali kontra l-vjolenza bbażata fuq is-sessi, f’video li ġie varat il-Ġimgħa. L-attakkanti Michael Mifsud u Alfred Effiong flimkien mad-difensur Andrei Agius u l-gowlkiper Andrew Hogg, dehru f’video li jifforma parti mill-kampanja tal-MFA u l-fondazzjoni tal-President għal ġid tas-soċjetà, bl-għan li tintemm il-vjolenza bbażata fuq is-sess.
Il-messaġġ ċentrali tal-video li wkoll jinvolvi lir-referee internazzjonali Trustin Farrugia Cann u l-plejer tat-tim nazzjonali tan-nisa Gabriella Zahra, hu li ma hemm l-ebda rebbieħ fi vjolenza minħabba s-sess, iżda telliefa biss, bil-plejers iħeġġu l-pubbliku biex ‘jixxutjaw’ din il-vjolenza darba għal dejjem.
Il-każi ta’ vjolenza domestika li kienu rrapurtati f’pajjiżna, li hu aspett wieħed tal-problema tela’ għal 1,272 każ komparat mal-450 tal-2008 skont il-CrimeMalta Annual Review.
Filwaqt li rringrazzjat lill-plejers tas-sapport, il-President ta’ Malta Marie-Louise Coleiro Preca qal li flimkien mal-MFA u l-Fondazzjoni tal-President għall-ġid tas-soċjetà, qed tmexxi din il-kampanja għaliex hi konvinta li jridu jimmiraw il-maġġoranza tal-pubbliku biex isolvu l-kwistjonijiet marbuta ma’ din it-tip ta’ vjolenza f’Malta.
L-MFA wkoll qed tagħti s-sapport tagħha lejn din il-kampanja, u matul dan l-istaġun fil-partiti tal-kampjonat Premier, il-plejers se jilbsu flokk biex ikomplu joħolqu kuxjenza fuq din il-kwistjoni.
Il-President tal-MFA Norman Darmanin Demajo qal li l-futbol hu għodda biex jippromwovi għanijiet tajbin u joħloq kuxjenza fuq kwistjonijiet importanti għal ġid tas-soċjetà tagħna. “L-MFA tagħti s-sapport kollu lill-Fondazzjoni tal-President biex tiżdied il-kuxjenza,” qal Darmanin Demajo.
Numru ta’ inizjattivi bis-sapport tan-Nazzjonijiet Maqgħuda, qed isiru madwar id-dinja biex tonqos din il-vjolenza, u l-kampanja Maltija għandha s-sapport tal-Football People Action, inizjattiva internazzjonali organizzata mill-Futbol kontra r-Razziżmu kontra l-Ewropa li għandha l-appoġġ tal-UEFA.
Illum, il-President ta’ Malta kienet qed tindirizza l-konvenzjoni li kienet ospitata mill-MFA bl-appoġġ ta’ FARE, bil-konvenzjoni ta’ din is-sena tiffoka fuq il-futbol u d-diversità.
