Is-sewwieq tal-Mercedes Lewis Hamilton kompla jersaq lejn ir-rebħ tar-raba’ kampjonat tas-sewwieqa wara rebħa tajba fil-Grand Prix tal-Istati Uniti qabel Sebastian Vettel. Bi tliet tiġrijiet għal tmiem il-kampjonat u b’massimu ta’ 75 punt li fadal għad-dispożizzjoni, Hamilton jinsab 66 punt qabel l-eqreb rivali Vettel, li spiċċa fit-tieni post.
Il-ħames post fil-Grand Prix li jmiss tal-Messiku jkun biżżejjed għal Hamilton biex isir biss il-ħames sewwieqa fl-istorja tal-Formula 1 li jirbaħ ir-raba’ kampjonat mondjali. Ir-riżultat ta’ din il-Grand Prix, ikkonferma wkoll ir-raba’ suċċess konsekuttiv għal Mercedes fil-kampjonat tal-kostrutturi.
Hamilton iċċelebra r-rebħa tiegħu fil-podju mal-aktar persuna veloċi fid-dinja Usain Bolt. “Sa issa kienet sena inkredibbli. Ma kontx qed nistenna li se jkolli r-ritmu li kelli fuq Sebastian imma ħassejt il-karozza fantastika,” qal Hamilton.
Vettel irnexxielu jaqbeż lil Hamilton fl-ewwel kantuniera u żamm l-ewwel post sas-sitt dawra, b’Hamilton juri s-superjorità tal-karozza b’mossa tajba. Minkejja li kiseb vantaġġ tajjeb fuq Vettel, Ferrari qatgħu kważi d-distakk kollu wara l-ewwel rawnd ta’ pit-stops b’Hamilton jgħaddi ftit qabel. Minn dak il-ħin li kienet l-20 dawra, Hamilton ma kellux problemi fejn ikkontrolla tajjeb u spiċċaw biex rebaħ b’distakk ta’ 10 sekondi.
It-tiġrija ta’ Vettel kien fadlilha aktar drama iżda, b’Max Verstappen tar-Red Bull jirnexxielu jkun veloċi biżżejjed biex il-Ġermaniż jagħmel it-tieni waqfa meta t-tyres bdew jisħnu żżejjed. B’tyres friski, Vettel irnexxielu jaqbeż lil Valtteri Bottas f’manuvra mill-aqwa b’ħames dawriet għat-tmiem, filwaqt li Kimi Raikkonen ħalla lill-Ġermaniż jgħaddi.
Raikkonen imbagħad kellu jiddefendi l-pressjoni ħarxa ta’ Max Verstappen fl-aħħar dawra u deher li ċaħħad lill-Finlandiż mill-podju b’mossa brillanti li fiha ħa riskju wkoll madwar tliet kantunieri lejn it-tmiem.
Iżda Verstappen li beda mis-16-il post, iċċelebra kmieni wisq hekk kif meta kien qed jitkellem ma’ Hamilton u Vettel fil-kamra ta’ ġewwa, l-istewards ħabbru li taw penalità ta’ ħames sekondi lill-Olandiż talli ħa vantaġġ meta ħareġ ftit miċ-ċirkwit. Red Bull kienu rrabjati għal din id-deċiżjoni, b’Verstappen bilkemm iħares lejn Raikkonen hekk kif il-Finlandiż kien qed ikellem lil Vettel.
Tiġrija oħra negattiva għal Fernando Alonso. Wara li kien irnexxielu jdaħħal il-karozza fiż-żona tal-punti, l-Ispanjol kellu problema fil-magna meta kien fis-seba’ post. L-istess destin kellu l-Awstraljan Daniel Ricciardo li kellu jirtira fis-16-il dawra minħabba problema fil-magna wara li kien għaddej tajjeb fejn fosthom kellu dwell sabiħ ma’ Valtteri Bottas.
Klassifika tas-sewwieqa
1. Lewis Hamilton 306 punti
2. Sebastian Vettel 247 punt
3. Valtteri Bottas 234 punt
4. Daniel Ricciardo 192 punt
5. Kimi Räikkönen 148 punt
6. Max Verstappen 111-il punt
