Ħaddiem barrani sofra feriti gravi wara li idu nqabdet bejn ‘cherrypicker’ u gallarija f’Rue D’Argens, fil-Gżira.
Jirriżulta li l-inċident seħħ għall-ħabta tat-3.15pm meta r-raġel kien qed jagħmel xi xogħol mal-faċċata ta’ residenza.
Kien f’dan il-mument li għal xi raġuni, idu nqabdet bejn iċ-‘cherrypicker’ u l-gallarija.
Il-Pulizija u membri mid-Dipartiment tal-Protezzjoni Ċivili ħadu sehem f’operazzjoni delikata biex ir-raġel ikun jista’ jitniżżel u jittieħed b’Ambulanza lejn l-Isptar Mater Dei għall-kura.
Hemm hu kien iċċertifikat li qed isofri minn feriti gravi.
Aktar investigazzjonijiet mill-Pulizija għadhom għaddejjin.
