FLORIANA……………..3
SENGLEA A…………….0
Floriana: I. Akpan, E. Pepe, E. Ruiz, S. Pisani, C. Borg, J. Cabral, A. Cini, A. Oyama, D. Grima (I. Varela 58’), M. Fontanella (L. Grech 85’), E. Marcellina (J. Baldacchino 69’)
Senglea: G. Cetrangolo, J. Bondin, S. Uyi, A. Terracciano, H. Vella, T. Vella, N. Palmier, M. Garcia, J. Leyton, N. Virano (Del Nero 69’) R. Dalli (P. Sammut 75’)
Skorjaw: A. Oyama 41’, M. Fontanella 62’, J. Cabral 79’ (F)
Referee: Matthew De Gabriele
Assistenti Referees: Luke Portelli, Christopher Francalanza
In-Nazzjon Plejer tal-logħba: Juninho Cabral (Floriana)
Attendenza: 352
Floriana jibqgħu qrib il-quċċata tal-kampjonat b’rebħa faċli fuq Senglea f’ partita li bdiet tieħu l-ħajja lejn tmiem l-ewwel taqsima. Floriana fl-ewwel taqsima jkunu kemxejn aktar kawti bil-ballun u sa fl-aħħar tat-taqsima rnexxielhom jiftħu l-iskor u daħlu jistrieħu minn fuq.
Il-captain Nicolas Chiesa mexxa lit-tim Furjaniż wara li l-kowċ Giovanni Tedesco ġie sospiż għal żewġ partiti minħabba li tkeċċa fi tmiem il-partita tal-ġimgħa l-oħra kontra Naxxar Lions. Senglea kellhom nieqsa fost l-oħrajn lil Steve Bonnici, Ian Azzopardi u Rene Caseres.
L-ewwel ċans tajjeb tal-partita wasal fis-26 minuta, minn Ryan Dalli ta’ Senglea, fejn naqas milli jikkonverti hekk kif b’daqqa ta’ ras mar żmerċ wara li rċieva ballun tajjeb mil-lemin minn Terence Vella.
Kwarta wara, Fontanella fetaħ il-logħob lejn in-nofs b’OYAMA kalm kalm jitfa’ lill-Furjaniżi fil-vantaġġ wara li kellu kontroll sew tal-ballun. Floriana baqgħu offensivi hekk kif daqqa ta’ ras ta’ Cabral żewġ minuti wara għaddiet ‘il bogħod mil-lasti ta’ Senglea.
Fit-tieni taqsima, Floriana ħarġu kif daħlu b’mentalità offensiva bit-tim Furjaniż beda jinqabad f’xi waqtiet bil-kontrattakk. Fil-51 minuta, daqqa ta’ ras minn Terracciano ta’ Senglea tgħaddi ‘l fuq mil-lasti Furjaniżi wara li minn freekick Virano tefa’ l-ballun tajjeb fil-kaxxa.
Tliet minuti wara, minn korner ta’ Pisani, Enzo Ruiz naqas milli jikkonverti bir-ras. Reazzjoni żewġ minuti wara minn Senglea permezz ta’ Terence Vella b’xutt minn barra l-kaxxa, iżda Akpan ma sabx diffikultà biex jilqa’ l-ballun.
Floriana rduppjaw fit-62 minuta, b’pass tajjeb mix-xellug ta’ Cabral, imxellef minn Varela lejn Mario FONTANELLA jkabbar il-vantaġġ għal tal-Irish. Minuta wara Fontanella naqas milli jagħmel id-doppjetta wara li spiċċa waħdu quddiem il-lasti tal-Isla, iżda x-xutt tiegħu għadda ħarira barra.
Fid-79 minuta Floriana baqgħu jippersistu, b’azzjoni li bdiet minn Cabral, li qabad fuq sieq waħda lil Senglea bil-ballun jispiċċa f’saqajn Steve Pisani li qassam il-ballun lejn Juninho CABRAL u tefa’ lil Floriana 3-0 minn fuq.
It-tim ta’ Senglea naqas milli jkompli l-mument pożittiv wara draw miksub fl-aħħar partita ma’ Gżira, b’tal-Irish ikomplu jissieltu ma’ ta’ fuq biex momentarjament telgħu fit-tieni post tal-klassifika.
