Rapport: Keane Cutajar
TARXIEN R……..2
LIJA A……………..3
Tarxien: C. Cassar, E. Baker, G. McKay, E. Calin (M. Traore 79’), A. Azzopardi (M. Spiteri 63’), J. Brincat, A. Scicluna, A. Benes, R. Darmanin (M. Desira Buttiġieġ 82’), R. Faria, S. Cipriott
Lija: L. Bonnici, P. Babic, P. Borg (L. Muscat 83’), D. Scerri, E. Beu, L J. Schembri, A. Kooh Sohna, A. Bello Osagie (A. Galea 73’), C. Cassar (M. Clinch 89’), O. Sidibe, D. Leeflang
Imwissija: E. Beu 15’, D. Scerri 17’, O. Sidibe 33’, C. Cassar 56’ (L) E. Calin 10’, S. Cipriott 20’ (T)
Tkeċċew: E. Beu 24’, (L) S. Cipriott 74’ (T)
Skorjaw: R. Darmanin 22’, G. McKay 34’ (T) P. Borg 49’, R. Kooh Sohna 66’, 90’ (L)
Referee: Eman Grech
Assistenti Referees: Alan Camilleri, Christopher Francalanza
Il-Mument Plejer tal-Logħba: Raphael Kooh Sohna (Lija Athletic)
F’logħba bejn żewġ timijiet li attwalment jinsabu jokkupuaw pożizzjonijiet fit-tieni nofs tal-klassifika rajna logħba b’żewġt uċuħ. Assistejna għal kontroll assolut Tarxiniż fl-ewwel taqsima u logħba kompletament differenti fit-tieni taqsima fejn Lija ħarġu minn fuq.
Kienet partita li laqqgħet lit-timijiet bl-iktar ammont ta’ gowls kontra sa issa fl-istaġun fejn Tarxien ħadu vantaġġ minn karta ħamra ta’ Lija kmieni fl-ewwel taqsima iżda ma ħarġux b’saħħithom għat-tieni.
Wirja qalbiena ta’ Lija fit-tieni taqsima bi plejer inqas sarfet fid-draw meritat għat-tim ta’ Joseph Galea. Wara li Lija ġabu d-draw, Tarxien ukoll spiċċaw jilagħbu b’għaxra u Lija ħatfu l-opportunità u t-tliet punti fl-aħħar sekondi.
Fl-20 minuta waslet l-ewwel azzjoni. Korner ta’ LeeJoe Schembri seta’ sarraf f’gowl iżda kien imdawwar minn fuq il-mimduda permezz ta’ Christian Cassar.
Żewġ minuti wara Tarxien fetħu l-iskor. Kien Patrick Borg li naqas li jbiegħed il-periklu wara save ta’ Bonnici biex tefa’ goal fuq platt għal Ryan DARMANIN li b’lasta vojta ma żbaljax.
Ftit wara is-sitwazzjoni għal Lija marret għall-agħar meta tkeċċa Erjon Beu wara li ddobba t-tieni karta safra wara fawl fuq Eduard Calin. Fit-33 minuta Ricardo Faria daħal tajjeb mix-xellug u ttanta xortih. Luke Bonnici kien attent u dawwar f’korner.
Mill-istess korner, Tarxien għamluhom tnejn. Kien Godwin McKAY li laħaq il-ballun u tefa’ fix-xibka wara li d-difiża ta’ Lija għal darba oħra naqset li tbiegħed il-periklu wara li Bonnici ma żammx.
Lija irrispondew immedjatement iżda x-xorti ma daħkitilhomx. Bello Osagie laqat l-lasta. Mill-istess azzjoni Tarxien ħarġu b’kontrattakk veloċi iżda James Brincat tefa’ barra minn qagħda tajba.
Lija naqsu d-distakk hekk kif fetħet it-tieni taqsima. Patrick Borg patta għal iżball tal-ewwel taqsima meta bir-ras għeleb lil Cassar biex daħħal lil Athletic lura fil-partita.
Fit-53 minuta Ayrton Azzopardi prova freekick dirett minn barra l-kaxxa. Bonnici niżel fil-baxx u salva. James Brincat daħal tajjeb fil-kaxxa fil-65 minuta u prova iżda l-gowlkiper ta’ Lija reġa’ kien attent.
Minuta wara Lija meritatament ġabu d-draw. Raphael KOOH SOHNA daħal tajjeb u waħdu ma’ Cassar laqat l-lasta fl-ewwel tentattiv tiegħu, biex mir-rebawnd ma żbaljax biex tefa’ ġewwa.
L-affarijiet ma tantx inbidilu għall-aħjar għat-tim ta’ Jose Borg meta tkeċċa Sean Cipriott fuq it-tieni karta safra kwarta mit-tmiem biex il-logħba kompliet l-partita għaxra kontra b’għaxra.
Lija ħatfu l-opportunita tad-demoraliżazzjoni ta’ Tarxien u ħatfu wkoll it-tliet punti fl-aħħar sekondi tal-partita. Reġa’ kien KOOH SOHNAli ħasad lil Cassar meta skorja t-tieni gowl personali tiegħu u t-tielet ta’ Lija.
