GŻIRA U…………….2
MOSTA………………2
Gżira: J. Haber, G. Muir, S. Kamana, S. Diamoutene, S. Borg, M. Avila Perez, R. Briffa, A. Cohen (Z. Scerri 62’), J. Corbolan, E. Okoye, S. Tounkara (N. Muscat 81’)
Mosta: A. Vella, R. Ekani, I. Maric, T. Farrugia, T. Veronese K. Magro, D. Ifeanyi (C. Camilleri 67’), Z. Brincat (J. Bekjiri 46’), D. Xuereb, E.Bilbao Zarate (N. Farrugia 83’), L. Ferreira
Imwissija: K. Magro 21’, R. Ekani 59’ (M), M. Avila Perez 72’, E. Okoye 90’ (G)
Skorjaw: S. Kamana og 9’, T. Farrugia 89’ (M), M. Avila Perez 35’, S. Tounkara 59’ pen (G)
Referee: Alan Mario Sant
Assistenti Referees: Jurgen Spiteri, Luke Portelli
Il-Mument Plejer tal-logħba: Moises Avila Perez (Gżira United)
It-tieni gowl tal-istaġun lejn it-tmiem ta’ Tyrone Farrugia ċaħħad lil Gżira United milli jirritornaw għar-rebħ meta spiċċaw fi draw ta’ 2-2. Mosta kellhom wirja tajba, iżda Gżira setgħu għalqu l-logħba qabel b’diversi okkażjonijiet speċjalment fit-tieni taqsima, biex spiċċa pattew qares.
Mosta marru minn fuq fid-disa’ minuta fl-ewwel azzjoni tal-logħba. Kien kross ta’ Thomas Veronese mix-xellug li kien imxellef minn Sem Kamana bil-ballun iqarraq b’Justin Haber. Il-Mostin reġa’ kellhom azzjoni oħra fit-18-il minuta meta Leandro Ferreira seraq ballun f’nofs il-grawnd mingħand Souleymane Diamoutene, avvanza u prova b’xutt minn barra l-kaxxa li iżda għadda għoli.
Reazzjoni minn Gżira li minuta wara pruvaw permezz ta’ xutt fil-baxx minn barra l-kaxxa ta’ Moises Avila Perez li għadda ftit barra. Mosta għal ftit ma rduppjawx fil-21 minuta f’azzjoni maħduma tajba b’Rodriguez Ekani jikkrossja mil-lemin lejn Dexter Xuereb li prova b’xutt mill-ewwel iżda l-konklużjoni tiegħu kienet salvata f’darbtejn minn Haber.
Gżira ngħataw penalty man-nofs siegħa meta r-referee Alan Mario Sant iġġudika li Ekani waqqa’ lil Emmanuel Okoye fil-kaxxa, fost il-protesti ta’ Mosta. Iżda mill-11-il metru, il-penalty fjakk ta’ Andrew Cohen kien salvat minn Andreas Vella. Madankollu sitt minuti wara, Gżira ġabu d-draw. Kien ballun fit-tul ta’ Roderick Briffa lejn Andrew Cohen li niżżel tajjeb lejn Moises AVILA PEREZ li b’xutt b’saħħtu spara wara Vella.
Gżira ħarġu aħjar fit-tieni taqsima u fit-48 minuta ħolqu azzjoni tajba. Kienet ħarba tajba ta’ Roderick Briffa lejn Okoye li kkontrolla l-ballun u qata’ fin-nofs lejn Andrew Cohen li xxuttja lejn il-lasta, iżda x-xutt kien imblukkat tajjeb minn Veronese.
Il-Maroons marru qrib fit-52 minuta b’xutt għar-rokna ta’ Moises Avila Perez li għadda ftit barra. Gżira ngħataw it-tieni penalty tal-logħba mas-siegħa logħob meta reġa’ kien Ekani li din id-darba waqqa’ lil Andrew Cohen. Inkariga ruħu Samba TOUNKARA li b’xutt fir-rokna xellugija ta’ fuq għeleb lil Vella.
Mosta baqgħu fil-logħba u fil-65 minuta marru qrib id-draw b’xutt djagonali fil-baxx ta’ Leandro Ferreira li għadda ftit barra. Seba’ minuti wara, Briffa għadda lejn Tounkara iżda x-xutt tiegħu kien salvat minn Vella biex fit-78 minuta Juan Corobolan naqas li jikkonkludi minn qagħda ideali wara kross ta’ Avila Perez.
Mosta għal ftit ma għamlux l-iskor indaqs fis-87 minuta meta minn kross ta’ Ferreira, ix-xutt tas-sostitut Calvin Camilleri kien imblukkat fil-ħin minn Kamana. Gżira setgħu għalqu l-logħba żewġ minuti wara iżda Roderick Briffa spara għoli wara kross mil-lemin.
Ta’ dan pattew qares għaliex ftit sekondi wara, Mosta ġabu d-draw bi kross ta’ Ferreira lejn l-iżmarkat Tyrone FARRUGIA li mill-viċin għeleb lil Haber b’xutt fil-baxx għar-rokna.
