Rapport: George Cassar
ĦAMRUN S……2
NAXXAR L…….0
Ħamrun: J. Galea, C. Zaccardo, T. Espindola, D. Zerafa, Mauricio (P. Chircop 74’), T. Agius, T. Caruana, D. Camilleri, Chico (L. Sciberras 68’), P. Henrique, L. Micallef (K. Micallef 21’)
Naxxar: C. Nicht, R. Cassar, D. Bonnici, A. Mendy, A. Cascaval, E. Ndoye, R. Grech (J. Debono 85’), M. Fenech (D. Falzon 67’), M. Bustos, Y. Messias, S. Fenwick
Skurjaw: Chico 39’, T. Espindola 64’ (Ħ)
Imwissija: R. Cassar 33’, R. Grech 56’ (N), T. Agius 70’ (Ħ)
Referee: Trustin Farrugia Cann
Assistenti Referees: Roberto Vella, Peter Abela
Il-plejer tal-logħba: Chico (Ħamrun Spartans)
Attendenza: 622
Żewġ gowls mill-plejers Brażiljani Chico u Thiago Espindola, wieħed f’kull taqsima, taw tliet punti lil Ħamrun minn fuq Naxxar. B’hekk l-Ispartans ikkonsolidaw is-seba’ post imma issa resqu iktar qrib it-timijiet ta’ fuq.
Il-Lions kienu l-aħjar tim għal ħafna mill-ewwel taqsima u kienu perikolużi l-iktar minn tliet konklużjonijiet ta’ Yuri Messias li f’waħda minnhom kien ferm qrib meta laqat sieq il-lasta wara kwarta.
Ħamrun taw l-ewwel xutt lejn l-aħħar tal-ewwel taqsima, iżda minn hemm ma ħarsux lura, u wara li marru minn fuq, ftit xejn kienu fil-periklu li jfallu r-rebħa. It-tim immexxi minn Jacques Scerri kien b’saħħtu f’nofs il-grawnd bi prestazzjonijiet tajbin ta’ Dale Camilleri li beda l-azzjonijiet taż-żewġ gowls, iżda anki tal-captain Triston Caruana u tal-plejer tal-logħba Chico.
Wara għoxrin minuta weġġa’ Lydon Micallef ta’ Ħamrun li deher ħiereġ diżappuntat hekk kif l-inċident jsta’ jtellfu milli jagħmilha mal-ewwel skwadra finali ta’ Tom Saintfiet għal-logħba ta’ Malta kontra l-Estonja nhar il-Ħadd li ġej.
Ħames minuti qabel intemmet l-ewwel taqsima Ħamrun għamlu l-ewwel gowl. F’azzjoni mibdija minn Camilleri mix-xellug, dan għadda lejn Cristian Zaccardo li ċċentra u ta ballun perfett lil CHICO li skorja b’xutt fil-baxx.
Ftit wara s-siegħa l-logħob l-Ispartans irduppjaw il-vantaġġ f’azzjoni għal darb’oħra mibdija minn Camilleri li seraq ballun lil Ryan Grech. L-azzjoni tkompliet minn Terence Agius li fetaħ fuq ix-xellug lejn Thiago ESPINDOLA li għeleb lil Christoph Nicht b’xutt fil-baxx. Waqt l-azzjoni, ftit qabel il-gowl, kien hemm żewġt iblalen fil-pitch, iżda l-ballboy ta’ Ħamrun ħareġ jiġbor wieħed minnhom u l-azzjoni kompliet biex eventwalment sar il-gowl.
Għaxar minuti mit-tmiem Naxxar kellhom gowl ta’ Scott Fenwick annullat wara li l-attakkant Ingliż ġie ġġudikat li ffawlja lil difensur Ħamruniż.
Ħamrun kellhom anki ċans għat-tielet wieħed meta l-ħarba veloċi ta’ Espindola ġabitu wiċċ imb wiċċ mal-gowlkiper Nicht li rnexxielu iżda jwaqqaf il-ballun b’wiċċu biex evita gowl ieħor.
