Valletta kisbu rebħa importanti meta għelbu lil Luxol 4-2 f’konfront ferm mistenni li ġabu attendenza tajba fil-Padiljun Sportiv ta’ Kordin. B’hekk il-Beltin komplew bis-serje ta’ rebħiet hekk kif din ir-rebħa kienet is-sitt waħda konsekuttiva.
Wara li ż-żewġ timijiet għamlu ħin twil għassa ta’ xulxin, ħames minuti mit-tmiem tal-ewwel taqsima, Gia Nikvashvili ra lil Jovica Milijic żmarkat quddiem il-lasta u tah il-ballun li minnu faċilment poġġa lill-Beltin fil-vantaġġ.
Fil-ftuħ tat-tieni taqsima, reġa’ kien Milijic li rdoppja l-iskor għat-tim mill-kapitali. Sitt minuti mit-tmiem, kien imiss lil Murtaz Kakabadze li kellu prestazzjoni mill-aqwa, sabiex skurja t-tielet gowl għal Valletta.
Kien hawn li Luxol ħarġu determinati li jieħdu xi ħaġa minn dan il-konfront. Hekk kif tefgħu kollox fuq l-attakk bl-inklużjoni ta’ Celino Alves bħala flying keeper. Din il-mossa ħadmet tajjeb u biha l-captain Mark Zammit skorja darbtejn.
Iżda l-Beltin li ma stennewx din ir-reazzjoni min-naħa ta’ Luxol, qamu għall-okkażjoni u fl-aħħar minuta Denis Di Maio ssiġġilla s-sitt rebħa konsekuttiva, fil-bidu ta’ dan l-istaġun.
F’aktar logħbiet, Pietà għelbu lit-tim ta’ taħt il-21 sena ta’ Swieqi United bl-iskor ta’ 11-0. Ħamrun Tre Angeli żiedu rebħa oħra meta għelbu lil Tarxien JMI bl-iskor ta’ 6-2.
Swieqi United irritornaw għar-rebħ meta għelbu lil Qormi 9-4. Mrieħel ESS ukoll irritornaw għar-rebħ meta għelbu lil Marsaskala 8-1. Fl-aħħarnett fid-derby studentesk bejn il-Junior College u t-tim tal-Università, l-Universitarji ħarġu rebbieħa bl-iskor ta’ 18-4.
Fil-klassifika tal-kampjonat, Valletta jibqgħu waħedhom fil-quċċata bi 18-il punt, segwiti mit-tim tal-Università u Pietà bi 15-il punt. Fit-tielet post hemm Ħamrun Tre Angeli bi 13-il punt. Luxol baqgħu b’disa’ punti daqs Swieqi United.
Tarxien JMI, Qormi u Mrieħel ESS għandhom sitt punti, filwaqt li Marsaskala għandhom tliet punti. Fil-qiegħ tal-klassifika, Junior College u t-tim ta’ taħt il-21 sena ta’ Swieqi United għadhom mingħajr l-ebda punt.
Logħob li jmiss
Għada
Padiljun Sportiv ta’ Kordin
Marsaskala v Swieqi 8.00pm
Mrieħel v Junior College 9.15pm
Il-Ħamis
Ħamrun v l-Università 8.00pm
Valletta v Tarxien 9.15pm
Il-Ġimgħa
Qormi v Luxol 8.00pm
Pietà v Swieqi 9.15pm
