Protesti kontra l-korruzzjoni fir-Rumanija

Eluf kbar ta’ dimostranti ħadu sehem f’sensiela ta’ protesti madwar ir-Rumanija f’tentattiv biex iwaqqfu lill-Gvern milli jgħaddi leġiżlazzjoni ġdida li tidher li għandha ddgħajjef il-poteri tal-Prosekutur għal kontra l-korruzzjoni.
Id-dimostranti daqqew il-ħornijiet fost għajjat ta’ ‘ġustizzja u mhux korruzzjoni’ waqt li mxew mill-kapitali, Bucharest, u bliet ewlenin oħra. Oħrajn organizzaw dimostrazzjoni quddiem il-bini tal-Parlament f’Bucharest fejn għajjtu li ‘ma jridux li r-Rumanija ssir pajjiż tal-ħallelin’.
Taħt il-proposti tal-Gvern, il-Ministru tal-Ġustizzja Rumen ikollu l-poter biex iqabbad u jkeċċi lill-ogħla prosekuturi tal-pajjiż, meta, fil-preżent, hu biss il-President tar-Rumanija li għandu din is-setgħa.
Il-protesti kontra l-korruzzjoni fir-Rumanija żdiedu mill-bidu tas-sena, u mindu l-Gvern Rumen kien ħa passi biex jiddiskriminalizza l-imġiba ħażina uffiċjali. ’Il fuq minn ġimagħtejn ta’ dimostrazzjonijiet, intant, kienu ġiegħelu lill-Gvern Rumen biex ixolji dik l-istrateġija.