Il-kowċ veteran Gian Piero Ventura tkeċċa minn kowċ tat-tim nazzjonali Taljan bi stqarrija uffiċjali tal-FIGC, iżda l-President Carlo Tavecchio mistenni jżomm postu fit-tmexxija tal-futbol Taljan. Il-favorit biex jieħu post Ventura jidher li hu Carlo Ancelotti.
Laqgħa tal-Federcalcio damet madwar sagħtejn li fiha kien konfermat Tavecchio bħala President wara li kiseb il-fiduċja mill-membri filwaqt li ttieħdet id-deċiżjoni fuq it-tneħħija ta’ Ventura.
Ventura kien maħtur kowċ tat-tim nazzjonali Taljan f’Lulju tal-2016 u mexxa lit-tim Taljan għall-fażi ta’ kwalifikazzjoni għat-Tazza tad-Dinja li fihom l-Italja kisbu seba’ rebħiet, żewġ draws u telfa iżda minkejja li spiċċaw bi 23 punt fil-grupp, spiċċaw fit-tieni post biex kellhom jilagħbu l-play-offs, liema żewġ partiti spiċċaw eliminati fihom kontra l-Iżvezja.
