Wara l-impenn tat-tim nazzjonali, illum jirritorna l-Kampjonat BOV Premier bil-11-il ġurnata. Illejla fis-7.00pm fl-Istadium taċ-Ċentinarju Gżira United għandhom iċ-ċans li jitilgħu momentarjament fil-quċċata b’konfront kontra Naxxar Lions li jinsabu fil-bżonn tal-punti.
Għada imbagħad jintlagħbu erba’ logħbiet. Fl-Istadium taċ-Ċentinarju fis-2.00pm St. Andrews jilagħbu kontra Lija Athletic f’konfront min-naħa ta’ isfel tal-klassifika, u warajhom jilagħbu Balzan kontra Tarxien Rainbows.
Fil-Hibernians Stadium, fis-2.00pm Mosta jilagħbu kontra Senglea Athletic, f’dik li se tkun l-ewwel logħba tal-kowċ il-ġdid Paolo Favaretto fit-tmexxija tat-tim tal-Isla. Warajhom tintlagħab logħba mistennija bejn iċ-champions Hibernians u Birkirkara.
Il-Ħadd imbagħad jintlagħbu żewġ logħbiet importanti u storiċi, f’dik li l-MFA qed tlaqqamhom Super Sunday minħabba l-valur storiku taż-żewġ konfronti. Fis-2.00pm fl-Istadium Nazzjonali Floriana jilagħbu kontra Sliema Wanderers fid-derby l-antik ta’ Malta. Fl-4.00pm Ħamrun Spartans jaffrontaw lil-leaders Valletta f’konfront li mistenni jattira attendenza sabiħa.
Bi preparazzjoni għall-partiti fi tmiem il-ġimgħa, l-MFA qed tagħmel video ta’ kull ġimgħa biex tħeġġeġ aktar in-nies jattendu mhux biss il-partiti tal-Kampjonat BOV Premier, iżda wkoll il-logħbiet mid-diviżjonijiet l-oħra.
