Rapport: Keane Cutajar
BALZAN…………..1
TARXIEN………….0
Balzan: S. Mintoff, J. Grioli (J. Borg 90+2’), M. Johnson, A. Effiong, U. Ljubomirac, M. Lepovic, B. Kaljevic, B. Giglio de Oliveira, A. Alves (M. Platisa 90+2’), C E. De Fiori Mendes, S. Arab
Tarxien: C. Cassar, E. Baker, J. Brincat, E. Calin (M. Brincat 90’), A. Agius (M. Traore 87’), L. Grech, A. Scicluna, A. Benes, R. Darmanin, R. Faria, M. Desira Buttigieg (A. Cilia Mumford 74’)
Skorja: B. Kaljevic 8’ (B)
Referee: Daryl Agius
Assistenti Referees: Duncan Sultana, Paul Apap
Il-Mument Plejer tal-Logħba: Carlos Eduardo De Fiori Mendes (Balzan)
Attendenza: 246
Quddiem attendenza fqira fil-grawnd taċ-Ċentinarju assistejna għal logħba li ma tantx offriet spettaklu. L-ewwel taqsima ftit li xejn kellha azzjonijiet u għalkemm rajna attakki fit-tieni, ftit li xejn kienu ta’ periklu. Balzan issograw u Tarxien resqu viċin li jakkwistaw xi ħaġa mil-logħba lejn l-aħħar iżda t-tliet punti marru n-naħa tal-ħomor.
B’din ir-rebħa Balzan, għalkemm ma mpressjonawx fil-prestazzjoni, saħħew posthom ma’ ta’ fuq filwaqt li Tarxien baqgħu viċin il-pożizzjoni l-ħamra tal-klassifika.
Balzan kellhom diversi plejers neqsin, b’Paul Fenech, Steve Bezzina u Ivan Janjusevic, fost oħrajn, ma kinux inklużi fl-iskwadra. Ryan Fenech kien parti mit-tmintax iżda ma lagħbx. Tarxien kellhom lil Sean Cipriott li attwalment jinsab b’self mingħand l-istess Balzan sospiż, filwaqt li Ayrton Azzoppardi jinsab imweġġa’. Kien hemm ukoll numru ta’ plejers fuq iż-żewġ naħat li lagħbu kontra l-eks tim tagħhom f’din il-parti.
Balzan marru fil-vantaġġ wara tmien minuti bl-ewwel azzjoni tal-partita. Samir Arab indirizza kross perfett mix-xellug li tefa’ lil Bojan KALJEVIC f’pożizzjoni fejn iktar kien mistenni jiskurja milli jfalli. Minn quddiem il-lasta s-solitu ma żbaljax.
L-istess Kaljevic iltaqa’ ma kross mil-lemin mas-siegħa logħob iżda falla l-mira bir-ras. Seba’ minuti wara De Fiori Mendes għeleb lid-difensuri ta’ Tarxien u daħal tajjeb iżda ra t-tentattiv tiegħu mdawwar f’korner b’devjazzjoni.
Hekk kif kien baqa’ 20 minuta logħo, Balzan resqu viċin is-siġill tar-rebħa. Kaljevic sab ruħu quddiem Cassar u minn qagħda angolata l-istess gowlkiper wera l-abbiltà tiegħu b’save sabiħ ta’ rifless veloċi. Mir-rebound Alfred Effiong kien żvinturat li laqat il-mimduda.
Żewġ minuti wara, Tarxien għal ftit ma ġabux il-parità. Free-kick ta’ Eduard Marian Calin ta biss l-illużjoni tal-gowl hekk kif ħabat max-xibka minn barra. De Fiori Mendes ittanta xortih minn freekick qrib il-kaxxa l-kbira hekk kif kien fadal għaxar minuti. Ix-xutt kien ċentrali u faċli għal gowlkiper li salva bla problemi. Kaljevic resaq viċin b’xutt tajjeb fit-88 minuta wara li għamel spazju għalih innifsu.
