Rapport: George Cassar
MOSTA…………..2
SENGLEA A……1
Mosta: A. Vella, I. Maric, R. Ekani, D. Mansi, T. Farrugia, K. Magro, E. Zarate, D. Biondo (K. Frendo 56’), T. Veronese, Z. Brincat (D. Fenech 89’), Leozinho (N. Frendo 93’)
Senglea A.: G. Cetrangolo, J. Bondin, J. Leyton, S. Uyi, A. Terreacciano, H. Vella (M. Del Negro 53’), M. Garzia, T. Vella, R. Dalli (P. Sammut 69’), G. Virano, A. Caseres
Skorjaw: Z. Brincat 23’ (M), G. Virano 45’ (S), D. Mansi 86’ (M)
Imwissija: H. Vella 15’ (S), T. Farrugia 24’, E. Zarate 43’, D. Biondo 49’, K. Magro 62’ (M), A. Terracciano 85’ (S)
Referee: Fyodor Zammit
Assistenti Referees: William Debattista, Peter Abela
Il-Mument plejer tal-logħba: Gonzalo Virano (Senglea Athletic)
Gowl ta’ Davide Mansi fl-aħħar erba’ minuti beda l-avventura tal-kowċ ta’ Senglea Paolo Favaretto fuq sieq ħażina. ao ZarateGħal darb’oħra f’dan il-kampjonat, Mosta reġgħu rnexxielhom jiksbu l-punti b’gowl lejn it-tmiem, u b’din ir-rebħa issa wessgħu l-marġini minn mal-istess Senglea għal ħames punti.
L-azzjonijiet li kienu l-iktar qrib il-gowl kienu tal-Isla, iżda Mosta tal-kowċ Johann Scicluna reġgħu wrew determinazzjoni u l-aħħar kelma kienet tagħhom. Fuq in-naħa ta’ Mosta kien hemm debutt ta’ Taljan ieħor iżda bħala plejer: Daniele Biondo, li ma impressjonax wisq.
Madankollu, għal dan patta t-Taljan l-ieħor Thomas Veronese li reġa’ kien hu li pprovda ż-żewġ gowls u kompla jikkonferma ruħu bħala l-aħjar akkwist ta’ Mosta għal dan l-istaġun u żgur li għandu ħafna mertu fil-progress tat-tim.
Wara għaxar minuti Terence Vella ħadem azzjoni tajba mal-lemin u ta għan-nofs lejn Augusto Caseres li għolla wisq il-ballun mill-viċin u kien kapaċi jolqot biss il-mimduda. Ta’ dan iċ-ċans moħli Senglea pattew qares għax kienu Mosta li marru fil-vantaġġ f’nofs l-ewwel taqsima. Minn kross mix-xellug ta’ Veronese, iż-żagħżugħ Zac BRINCAT daħal f’nofs id-difiża Sengleana u tefa’ l-ballun fix-xibka.
Senglea ġabu l-gowl tal-parità fl-aħħar azzjoni tal-ewwel taqsima b’kapolavur ta’ Gonzalo VIRANO li b’xutt tremend minn tliet kwarti ta’ grawnd, tefa’ fix-xibka wara devjazzjoni. Dan il-gowl ta spinta lil Senglea li fit-tieni taqsima daħlu iktar fil-logħba u wara siegħa kellhom l-aħjar ċans meta Caseres din id-darba kien hu li ta għan-nofs lejn Vella, iżda l-Pilla minn taħt il-lasta spara għoli.
Il-gowl deċiżiv wasal erba’ minuti mit-tmiem meta l-free-kick mil-lemin ta’ Veronese għadda tul il-lasta sakemm daħal Davide MANSI li dawwar il-ballun għal ġox-xibka. Il-gowl ġab ewforija fost il-partitarji Mostin li baqgħu sa wara l-partita jkantaw “Ġibu lill-ġirien” hekk kif il-ġimgħa d-dieħla se jirritorna fil-Premier id-derby tat-Tramuntana bejn Mosta u Naxxar Lions.
