Il-ġonna tal-Palazz Verdala fil-Buskett sebħu bil-ferħ tat-tfal taż-żewġ skejjel primarji ta’ Ħal Qormi jiċċelebraw il-Jum Dinji għat-Tfal.
It-tfal Qriema kellhom għadd t’attivitajiet edukattivi u divertenti mmirati għalihom bħal spettaklu bil-puppets, tagħlim kontra l-bullying u fuq ir-riċiklar tal-iskart, kif ukoll attivitajiet ta’ team building imħejjija mill-Kummissarjat għat-Tfal bil-għan li tinħoloq kuxjenza fuq id-drittijiet tat-tfal infushom. NET News tkellem mal-Aġent President ta’ Malta, l-E.T. Dolores Cristina, fuq id-drittijiet u dmirijiet tat-tfal fis-soċjetà Maltija:
Fid-diskors tal-wasla tagħhom fil-Palazz, hija appellat lit-tfal sabiex jaħsbu fi tfal oħra li m’għandhomx l-istess xorti tagħhom li jmorru l-iskola, li jkollhom x’jieklu u jixorbu ilma nadif. Waqt dan il-messaġġ, innutajna għadd ta’ tfal jifirħu u jilagħbu ma’ kelb żgħir jiġri fosthom li jiffrekwenta l-ġonna .
Din l-attività kienet organizzata mill-Kunsill Lokali ta’ Ħal Qormi flimkien mal-Uffiċċju tal-President u l-Kummissarjat għat-Tfal.
Ritratti ta’ Matthew Tabone u filmat ta’ Noel Zammit.
