L-aħħar xhur tas-sena mhux sinonimi mal-Waterpolo iżda x-xhur ta’ Diċembru u Jannar se jibdew ikunu dedikati wkoll għall-Waterpolo, hekk kif se ssir l-Enemed Waterpolo Cup għall-ewwel darba.
Dan it-tournament se jintlagħab fuq rawnd, bl-ewwel żewġ timijiet jikkwalifikaw dritt fis-semifinali, filwaqt li min jispiċċa bejn it-tielet u s-sitt post jilagħbu play-off bejniethom, bir-rebbieħa jilagħbu s-semifinali.
Il-Kap Eżekuttiv tal-Enemed Kevin Chircop irringrazzja lil Joe Caruana Curran tal-enerġija tiegħu biex iżomm l-isport miexi fid-direzzjoni t-tajba. Hu qal li d-deċiżjonijiet li ttieħdu li jisponsorjaw lill-assoċjazzjoni, ħalliet il-frott, minħabba l-kontinwazzjoni ta’ suċċess li t-timijiet nazzjonali kellhom.
Preżenti kien hemm ukoll il-Ministru tal-Enerġija u l-konservazzjoni tal-ilma Joe Mizzi li tenna l-appoġġ tal-kumpanija li tibqa’ tgħin lil Waterpolo. Il-kuntratt preżenti tal-Enemed jiskadi fi tmiem is-sena l-2018, iżda mistenni jiġġedded minħabba r-relazzjoni tajba li hemm bejn iż-żewġ partijiet.
Il-President tal-ASA Joe Caruana Curran irringrazzja lill-klabbs kollha li jagħtu s-servizz lill-isport billi jrawmu l-plejers. Hu qal li dan it-tournament li se jintlagħab f’Diċembru u Jannar se jservi wkoll bħala preparazzjoni għall-play-offs tal-Kampjonat Ewropew kontra l-Belarus, bl-għan li t-tim Malti jikkwalifika għat-tieni edizzjoni konsekuttiva tal-Kampjonat Ewropew li se jsir f’Barcelona. Caruana Curran tenna t-tama tiegħu li f’dawn il-logħbiet importanti jkollhom is-sapport finanzjarju.
Il-President tal-ASA tkellem aktar fid-dettall fuq il-preparazzjoni tat-tim Malti għall-partiti kontra l-Belarus. Hu qal li bħala parti mit-tħejjija t-tim Malti se jieħu sehem fl-Europa Cup fi Split, il-Kroazja. Huma se jkunu fil-grupp flimkien mas-Serbja, il-Kroazja, il-Greċja u l-Olanda. Minn Split, grazzi għall-kuntatti mal-eks plejer ta’ Neptunes Vladimir Gojkovic, it-tim Malti se jmur f’Herzeg-Novi l-Montenegro għall-kamp ta’ taħriġ ta’ ħamest ijiem biex imbagħad jibqa’ sejjer dirett il-Belarus.
Il-programm kollu ta’ logħob se jidher fil-ħarġa ta’ għada ta’ In-Nazzjon.
L-ewwel ġurnata
Is-Sibt 2 ta’ Diċembru
Sirens v Sliema 3.00pm
Ta’ Xbiex v San Ġiljan 4.15pm
Neptunes v Valletta 5.30pm
