Il-captain tat-tim nazzjonali Malti Stevie Camilleri rebaħ l-unur tal-Plejer tas-Sena tal-ASA għas-seba’ darba fil-karriera tiegħu. Dan l-unur kien mistenni li jintrebaħ minn Camilleri wara li ntgħażel l-aqwa plejer fix-xhur ta’ Lulju u Awwissu, bil-gowlkiper ta’ Sirens Nicky Grixti jirbaħ l-ewwel unur dak ta’ Ġunju.
Camilleri ilu jilgħab għal diversi snin barra minn xtutna, u f’dan is-sajf ingħaqad ma’ Roma Nuoto. Stevie Camilleri rebaħ l-ogħla unur personali fil-Waterpolo lokali fl-2007, fl-2011, l-2012, l-2013, l-2015, l-2016 u l-2017, biex b’hekk rebaħ is-sitt unur fl-aħħar seba’ snin.
F’kumment li dan is-sit għamel ma’ Stevie Camilleri, il-plejer li f’pajjiżna jilgħab ma’ Neptunes qal li l-unuri personali huma dejjem apprezzati għaliex huma forma ta’ rikonoxximent għax-xogħol iebes u s-sagrifiċċji li jagħmel.
Minbarra l-Plejer tas-Sena tal-Kampjonat Premier intrebħu diversi unuri oħra. Ix-xellugi Luke Hyzler rebaħ il-Plejer tas-Sena tal-Ewwel Diviżjoni. Hyzler li hu plejer ta’ Sliema lagħab fl-aħħar tliet staġuni ma’ Otters fejn stabilixxa ruħu bħala wieħed mill-plejers importanti tat-tim Għawdxi. Hyzler kien rebaħ il-Plejer tax-Xahar f’Ġunju.
Il-plejer tat-tim nazzjonali Malti u ta’ Exiles Kendra Navarro rebħet l-unur tal-Plejer tas-Sena tan-nisa. Jamie Gambin ta’ Sliema rebaħ l-unur tal-aqwa plejer ta’ taħt l-20 sena, Jacob Sciberras ta’ Sirens rebaħ l-aqwa plejer ta’ taħt is-17-il sena, Jake Muscat ta’ Neptunes rebaħ l-unur ta’ taħt il-15-il sena u Alec Fenech ta’ Sliema spiċċa l-aqwa plejer ta’ taħt it-13-il sena.
Il-preżentazzjoni ta’ dawn l-unuri se ssir f’data li għadha trid tiġi mħabbra.
