Bejn illum u l-Ħadd tintlagħab it-12-il ġurnata tal-Kampjonat BOV Premier. Tmiem il-ġimgħa partikolari hekk kif mis-seba’ logħbiet f’din il-ġurnata, hemm erba’ derbies li mistennija jattiraw aktar interess mis-soltu.
Illum fis-7.00pm fl-Istadium taċ-Ċentinarju Birkirkara jilagħbu kontra St. Andrews, bl-Istripes jittamaw li jirritornaw għar-rebħ wara li ġejjin minn żewġ telfiet konsekuttivi kontra Balzan u Hibernians. St. Andrews fl-aħħar partita rritornaw għar-rebħ tal-punti bi draw kontra Lija Athletic.
Għada imbagħad fil-Hibernians Stadium fis-2.00pm Sliema Wanderers jilagħbu kontra Gżira United fid-derby tax-Xatt. Is-Slimiżi ġejjin minn telfa ta’ 1-0 fid-derby l-antik kontra Floriana, filaqt li Gżira rebħu fl-aħħar logħba kontra Naxxar. Warajhom fl-4.00pm jirritorna d-derby tat-Tramuntana bejn Naxxar Lions u Mosta. Għan-Naxxarin se jagħmel id-debutt fit-tmexxija tat-tim Oliver Spiteri. Mosta rebħu l-aħħar logħba kontra Senglea Athletic.
Fl-Istadium taċ-Ċentinarju fis-2.00pm Lija Athletic jilagħbu kontra Ħamrun Spartans, biż-żewġ timijiet jispiċċaw draw fl-aħħar logħba kontra St. Andrews u Valletta rispettivament. Fl-4.15pm Senglea Athletic jilagħbu kontra Balzan. Senglea jittamaw li jiksbu l-ewwel rebħa taħt il-kowċ il-ġdid Paolo Favaretto wara li fid-debutt tiegħu l-ġimgħa l-oħra tilfu 2-1 kontra Mosta. Balzan għaddejjin minn perjodu pożittiv u ġejjin minn erba’ rebħiet konsekuttivi.
Il-Ħadd jintlagħbu żewġ derbies oħra fl-Istadium Nazzjonali. Fis-2.00pm jintlagħab id-derby ta’ Nofsinhar bejn Tarxien Rainbows u Hibernians. Iċ-champions rebħu l-aħħar logħba 1-0 kontra Birkirkara, filwaqt li bl-istess skor Tarxien tilfu kontra Balzan. It-12-il ġurnata tal-kampjonat tagħlaq bl-aktar derby mistenni bejn Valletta u Floriana. Il-Beltin ġejjin minn draw ta’ 0-0 kontra Ħamrun filwaqt li Floriana għelbu lil Sliema u għadhom l-uniku tim mingħajr telfa.
