Rapport: Keane Cutajar
SENGLEA A…………0
BALZAN………………1
Senglea: G. Cetrangolo, J. Bondin, R. Vella, J. Leyton, S. Uyi, M. Garzia, I. Paz, G. Virano, R. Dalli, N. Palmieri, T. Vella (P. Sammut 82’)
Balzan: I. Janjusevic, S. Bezzina, M. Johnson, E. Serrano Valero, U. Ljubomirac, M. Lepovic, B. Kaljevic (J. Grioli 90’), P. Fenech, A. Alves (A. Effiong 67’), C. Mendes (J. Zerafa 87’), S. Arab
Imwissija: E. Serrano Valero 14’ (B)
Skorja: B. Kaljevic 45’ (B)
Referee: Ishmael Barbara
Assistenti Referees: Duncan Sultana, Peter Abela
Il-Mument Plejer tal-logħba: Carlos Eduardo De Fiori Mendes (Balzan)
Attendenza: 434
Balzan reġgħu kkontrallaw iżda issugraw hekk kif l-okkażjonijiet ma sarfuhomx f’gowls u żammew gowl vantaġġ biex akkwistaw tliet punti importanti li bihom telgħu momentarjament waħedhom fl-ewwel tal-klassifika. Senglea wrew l-inizjattiva lejn l-aħħar tal-partita iżda kollu kien għalxejn.
It-tim ta’ Micovic se jkun qiegħed isegwi l-partita ta’ Valletta u Floriana b’interess kbir hekk kif jistgħu jibqgħu l-ewwel waħedhom jekk Valletta jonqsu li jakkwistaw it-tliet punti, wara li Gżira fallew kontra Sliema. Balzan komplew jibdlu l-ismijiet tagħhom fl-ewwel ħdax u għalkemm irritornaw għalihom ħafna plejers fosthom il-captain Paul Fenech, Ryan Fenech u Alfred Effiong kienu fuq il-bankina.
Hekk kif għaddew kwarta logħob Bojan Kaljevic u Carlos De Fiori Mendes ħabtu tajjeb il-ballun ma xulxin. De Fiori Mendes ikkonkluda mill-kaxxa iżda Giulio Cetrangolo niżel u salva fil-baxx. Alex Da Paixao Alves għamel spazju għax-xutt wara 22 minuta. Ix-xutt tiegħu kien ċentrali u faċli għall-gowlkiper ta’ Senglea. Cetrangolo reġa’ salva hekk kif qabżu n-nofs siegħa logħob wara xutt minn barra l-kaxxa.
Free-kick ta’ De Fiori Mendes minn pożizzjoni viċin il-bandiera tal-korner kien imdawwar f’korner tliet minuti minn tmiem l-ewwel taqsima bi bravura tal-gowlkiper tal-Isla. Fil-45 minuta, ħarġa difettuża ta’ Cetrangolo sarrfet f’gowl għal Balzan. Is-solitu KALJEVIC fetaħ l-iskor b’daqqa ta’ ras.
Balzan resqu viċin it-tieni fit-53 minuta. Da Paixao Alves daħal tajjeb u sab it-tentattiv tiegħu salvat minn Cetrangolo. Il-ballun għal ftit ma daħalx u anke ħabat mal-lasta qabel inqala’ barra.
Senglea resqu viċin mas-63 minuta logħob. Iż-żewġ attakkanti ma ftehmux bil-ballun jispara għoli. Freekick ta’ De Fiori Mendes wassal għal ċans tajjeb għal Michael Johnson. Dan tal-aħħar falla l-mira bir-ras minn qagħda tajba hekk kif kien fadal 20 minuta logħob.
Ryan Dalli daħal tajjeb tmien minuti wara. Qabel seta’ jikkonkludi, Johnson dawwar f’korner bi bravura. Is-sostitut Peter Sammut ra x-xutt tiegħu jgħaddi ftit barra fl-aħħar azzjoni tal-partita biex Senglea baqgħu ma rnexxielhomx igibu d-draw.
