Rapport: George Cassar
NAXXAR L………2
MOSTA……………0
Naxxar: O. Borg, A. Buhagiar, R. Cassar, E. Ndoye, A. Cascaval, R. Grech, M. Bustos (J. Debono 91’), M. Micallef, S. Fenwick (D. Bonnici 79’), Y. Messias, D. Falzon (M. Fenech 87’)
Mosta: A. Vella, I. Maric, T. Veronese, D. Mansi, T. Farrugia, K. Magro, E. Zarate, D. Nworah (C. Camilleri 87’), Z. Brincat, R. Ekani, Leozinho
Skorjaw: S. Fenwick 66’, D. Bonnici 93’ (N)
Imwissija: D. Falzon 45’ D. Bonnici 90’ (N), R. Ekani 47’, I. Maric 65’, K. Magro 74’, T. Veronese 90’ (M)
Tkeċċa: R. Ekani 85’ (M)
Referee: Alan Mario Sant
Assistenti Referees: Jurgen Spiteri, Paul Apap
Il-Mument Plejer tal-logħba: Daren Falzon (Naxxar Lions)
Attendenza: 810
L-avventura tal-kowċ il-ġdid ta’ Naxxar Lions Oliver Spiteri kellha bidu ideali b’rebħa fuq ir-rivali Mosta b’żewġ gowls fit-tieni taqsima. Din hija biss it-tieni rebħa ta’ Naxxar fil-kampjonat wara dik fuq St. Andrews iktar minn xahar ilu. B’dawn it-tliet punti l-klassifika għalihom diġà hija ħafna aħjar hekk kif issa qabżu lil St. Andrews u Tarxien Rainbows u laħqu lil Senglea Athletic fl-għaxar post b’disa’ punti.
Mosta kellhom bidu aħjar u ħarġu għall-avversarji, iżda donnu li d-diskors fl-intervall tal-kowċ Spiteri kien effettiv, għax fit-tieni taqsima Naxxar kienu ttrasformati fejn iddominaw lil Mosta u finalment rebħulhom meritatament.
Qabel intemmet l-ewwel taqsima, Yuri Messias kien sfortunat wara li x-xutt tiegħu minn barra l-kaxxa għeleb lill-gowlkiper Andreas Vella iżda ħabat mal-wieqfa. It-tieni taqsima kienet kważi kollha ta’ Naxxar. Mas-siegħa logħob ir-rovexxjata sabiħa mill-viċin ta’ Daniel Bustos għaddiet ftit ’il fuq mill-mimduda. Ftit wara, xutt ieħor mid-distanza ta’ Messias ħareġ l-aħjar tal-gowlkiper Mosti li dawwar f’korner.
Il-gowl kien fl-arja u wasal fis-66 minuta. Minn free-kick ta’ Daren Falzon mix-xellug qrib il-bandiera tal-korner, id-daqqa ta’ ras ta’ Elhadji Ndoye kienet milqugħa minn Vella li rnexxielu jsalva żewġ tentattivi. iżda ma seta’ jagħmel xejn għat-tielet wieħed ta’ Scott FENWICK li spiċċa fix-xibka.
Mosta ma wiġbux għal dan il-gowl u l-partita kompliet tiġihom agħar meta ħames minuti mit-tmiem Rodriguez Ekani ġie muri t-tieni karta safra wara fawl f’nofs il-grawnd fuq Messias.
Fid-90 minuta Naxxar laqtu l-lasta għat-tieni darba minn Messias wara pass mix-xellug ta’ Mano Micallef. Il-Lions issiġġillaw ir-rebħa bit-tieni gowl li kien segwit ukoll mis-suffara finali. Minn kontrattakk mibdi minn Messias, is-sostitut Duane BONNICI spiċċa waħdu quddiem Vella u għaddielu l-ballun minn bejn saqajh u tefa’ fix-xibka. Il-partitarji Naxxarin kienu f’ċelebrazzjoni sħiħa hekk kif issa jittamaw li din ir-rebħa fuq ir-rivali tagħtihom stimolu għall-kumplament tal-istaġun.
