SIRENS ………………….. 2
PIETA H. ……………….. 3
Sirens: R. Marmara, R. Previ, B. Kremenovic, D. Sant, L. Zammit (L. Galea 76′), J.N. Azzopardi, D. Medic (I. Curmi 84′), C. Caruana, D. Agius, M. Micallef (G. Galea 54′), A. Obaje.
Pietà: M. Montfort, C. Degabriele, J. Ruiz Perez, C. Grech, J. Ishaya Irimiya, Q. Bregman, D. Agius, N. Pace Cocks (C. Gauci 81′), L. Chiedozie (G. Mensah 90′), J. Busuttil, T. Bartolo.
Referee: Alex Johnson
Minkejja li lagħbu t-tieni taqsima b’għaxar plejers, Pietà kisbu r-raba’ rebħa konsekuttiva meta għelbu lil Sirens b’doppjetta ta’ Chiedozie, biex b’hekk saħħew it-tieni pożizzjoni fil-klassifika.
Pieta kien jimmeritahom is-suċċess anki jekk wara t-tkeċċija ta’ Agius kmieni fit-tieni taqsima, għaddew minn mumenti diffiċli iżda huma kkontrollaw tajjeb biex lejn it-tmiem għalqu l-logħba bit-tielet gowl.
Wara biss 53 sekonda, Pietà kienu diġà fil-vantaġġ meta Jan Busuttil żmarka lil LAWRENCE CHIEDOZIE li avvanza u għeleb lil Marmara b’xutt fil-baxx. Żewġ minuti wara, Pietà ferm viċin it-tieni gowl meta minn azzjoni ta’ korner Ruiz Perez mattar siequ bil-ballun jgħaddi jħakkek mal-wieqfa.
Wara l-bidu dominanti tal-Hotspurs, il-logħba bdiet issir iktar bilanċjata u fit-22 minuta Sirens kienu sfortunati meta xutt bomba ta’ Christian Caruana stampa mal-mimduda b’Montfort megħlub. Fis-27 minuta, Pieta rduppjaw meta Dylan Agius qassam lejn JAN BUSUTTIL li mid-distanza fajjar xutt sabiħ li għeleb għal kollox lil Marmara.
Ftit minuti wara, azzjoni oħra perikoluża ta’ Pietà fejn Chiedozie kien imċaħħad minn save brillanti ta’ Marmara. Erba’ minuti mill-intervall, Sirens daħlu mill-ġdid fil-logħba meta minn azzjoni ta’ korner kien Neil Pace Cocks li bir-ras xeħet fix-xibka tiegħu stess.
Fl-54 minuta, Pietà spiċċaw b’għaxar plejers meta Dylan Agius intwera t-tieni karta safra. Minn hawn ‘l quddiem kienu Sirens li ħadu l-logħba f’idejhom ifittxu l-gowl tad-draw, iżda Pietà għalqu tajjeb fejn Ruiz Perez kien brillanti fid-difiża.
Kwarta mit-tmiem f’azzjoni ta’ kontrattakk resqu qrib bix-xutt ta’ Chiedozie salvat minn Marmara. Erba’ minuti mit-tmiem Pietà għalqu l-logħba meta Bregman żmarka lil CHIEDOZIE li b’xutt preċiż fil-baxx għeleb lil Marmara.
Fil-ħin miżjud Pieta resqu qrib ir-raba’ gowl b’xutt fil-baxx tas-sostitut Mensah bil-ballun jaħbat ma’ sieq il-lasta, biex f’risposta immedjata Sirens naqqsu l-iskor meta OBAJE skorja wara azzjoni ta’ kontrattakk.
