EXILES JETFREIGHT………….8
NEPTUNES LEO VEGAS……..10
(1-3), (3-0), (1-3), (3-2)
Neptunes Leo Vegas irritornaw għar-rebħ meta għelbu l-isfida ta’ Exiles Jetfreight 10-8 f’logħba missielta. Il-logħba ħadet xejra differenti f’żewġ okkażjonijiet, b’Neptunes jirnexxielhom jikkontrollaw aħjar il-logħba.
Kienu Exiles li skorjaw l-ewwel permezz ta’ Timmy Sullivan, iżda doppjetta ta’ Nicholai Zammit dawret ir-riżultat, b’Gabriel Pace jagħmilhom 3-1. Neptunes sofrew daqqa ta’ ħarta lejn tmiem l-ewwel sessjoni wara li l-captain Niki Lanzon tkeċċa għal kollox mil-logħba wara rimarki li għadda lejn ir-referee.
Exiles dehru li ħadu vantaġġ minn din id-deċiżjoni meta rnexxielhom itemmu t-tieni sessjoni 4-3 minn fuq, bi tliet gowls konsekuttivi wara doppjetta ta’ Niki Paris u gowl ta’ Andrea Bianchi.
Cousin għamilhom 5-3 fil-bidu tat-tielet sessjoni, madankollu Jordan Camilleri u Gabriel Pace ġabu d-draw. Il-logħba kellha żvolta oħra b’żewġ minuti u 49 sekonda għat-tmiem it-tielet sessjoni. Dan wara li tkeċċa Kurt Griscti għal brutalità biex Exiles kellhom jilagħbu erba’ minuti bi plejer anqas.
Neptunes skorjaw żewġ gowl fil-minuti bi plejer aktar minn Matthias Azzopardi u Miguel Zammit biex marru 7-5 minn fuq fil-bidu tal-aħħar sessjoni.
Neptunes żiedu ieħor wara l-logħba kompliet tintlagħab bi plejers indaqs, b’Exiles iwieġbu tliet darbiet wara gowls ta’ Neptunes, b’tal-aħħar jibqgħu b’vantaġġ ta’ żewġ gowls.
Exiles: A. Xuereb, K. Navarro, A. Bianchi (2), P. Paris, T. Sullivan (1), S. Xerri de Caro, M. Fenech, K. Griscti, N. Paris (2), A. Cousin (2), B. Lanzon (1), J. Bajada, L. Felice
Neptunes: A. Borg Cole, N. Lanzon, K. Erdogan, G. Pace (2), T. Agius, M. Lanzon, M. Cutajar, J. Camilleri (3), J. Culic, M. Zammit (1), N. Zammit (2), M. Azzopardi (2), F. Buhagiar
Referees: Ronnie Spiteri, Massimo Angileri
San Ġiljan jibqgħu jirbħu
SAN ĠILJAN TUM INVEST….8
VALLETTA UNITED……………7
(1-2), (1-1), (3-3), (3-1)
San Ġiljan Tum Invest għelbu lil Valletta United 8-7. Il-partita kienet waħda missielta bejn iż-żewġ timijiet iżda wieħed ma jridx jinsa l-fatt li San Ġiljan kienu mingħajr diversi plejers regolari fosthom Ben Plumpton, Andreas Galea, Dino Zammit, Darren Zammit, bl-uniċi plejers tal-ewwel skwadra li lagħbu kienu l-captain Matthew Zammit, Paul Fava u Peter Borg.
It-tim żagħżugħ ta’ Orlovic irnexxielu jirbaħ b’xi mod, anki jekk Valletta, li kellhom biss disa’ plejers fit-tim, offrew sfida denja kif setgħu.
Ben Grech poġġa lil San Ġiljan minn fuq, iżda gowls minn James Spiteri u Andrea Agius taw vantaġġ lil Valletta liema vantaġġ żammewh sa tmiem l-ewwel sessjoni. Rainier Scerri għamilhom 3-1 fit-tieni sessjoni, b’Matthew Zammit iwieġeb għal San Ġiljan.
Valletta reġgħu bnew vantaġġ ta’ żewġ gowls fit-tielet sessjoni permezz ta’ Andrea Agius, iżda rimonta minn San Ġiljan wasslet biex dawru l-iskor b’gowl ta’ Paul Fava u doppjetta ta’ Ben Grech. Madankollu Ryan Mock u Keith Galea żammew lil Valletta minn fuq fi tmiem it-tielet sessjoni.
Gowls minn Matthew Zammit u Peter Borg poġġew lil San Ġiljan minn fuq fis-sessjoni deċiżiva. Ryan Mock ġab id-draw b’backhand tajjeb, iżda San Ġiljan skorjaw dak li kellu jkun il-gowl tar-rebħa fl-azzjoni ta’ wara b’gowl ta’ Peter Borg mix-xellug.
San Ġiljan: J. Tanti, P. Borg (2), C. Farrugia, B. Grech (3), J. Galea, M. Zammit (2), A. Saliba, D. Ciantar, T. Said, J. Bonavia, P. Fava (1), A. Abela, T. Micallef
Valletta: R. Sciortino, J. Spiteri Staines (1), L. Calleja, R. Scerri (1), R. Mock (2), D. Paolella, D. Saliba, A. Agius (2), K. Galea (1), L. Gialanze
Referees: Ronnie Spiteri, Neville Mercieca
Faċli għal Sirens
TA’ XBIEX AMIGOS…….2
SIRENS GREENTUBE….10
(1-1), (0-3), (1-3), (0-3)
Sirens Greentube kisbu t-tieni rebħa tal-kompetizzjoni wara li mingħajr diffikultà għelbu lil Ta’ Xbiex Amigos 10-2 f’logħba kwieta.
L-ewwel sessjoni ntemmet 1-1 wara li Keith Tanti wieġeb għall-penalty ta’ John Brownrigg. Sirens irnexxielhom itemmu t-tieni sessjoni 4-1 minn fuq, bi tliet gowls lejn it-tmiem is-sessjoni, skorjati minn Matthew Sciberras, John Brownrigg u Jacob Sciberras rispettivament.
Sirens komplew iżidu l-iskor bi tliet gowls oħra ta’ Clint Mercieca, Jacob Sciberras u Edward Aquilina, b’Ta’ Xbiex iwieġbu b’gowl ta’ Gerald Sammut miċ-ċentru lejn it-tmiem.
Il-kowċ ta’ Sirens Sasko Popovski bidel diversi plejers fl-aħħar sessjoni biex jagħtu spazju lill-plejers kollha, iżda Sirens baqgħu xorta jiddettaw il-logħob. Huma skorjaw tliet gowls oħra minn John Brownrigg, Edward Aquilina u Jacob Sciberras.
Ta’ Xbiex: Z. Sciberras, M. Manara, L. Galea, B. Cachia, K. Mock, G. Blundell, T. Gambin, E. Carabott, G. Sammut (1), K. Tanti (1), N. Saliba, L. Mugliett, L. Hyzler
Sirens: N. Grixti, J. Zerafa Gregory, E. Aquilina (2), J. Sciberras (3), M. Grech, A. Camenzuli, C. Mercieca (1), M. Sciberras (1), J. Napier, C. Zammit, J. Brownrigg (3), J. Ciantar, O. Gauci
Referees: Massimo Angileri, Peter Balzan
