ŻEBBUĠ R. ………………….5
MARSA ………………………..0
Żebbuġ: J. Farrugia, M. Attard (A. Micallef 75’), S. Schembri, F. Gusman, R. DA Silva Gomes, C. Gauci, A. Curmi (M. Bonnici 71’), K. Zammit, L. Mallia, A. Mello Da Silva (L. Gatt 80’), A. Kovacic.
Marsa: W. Galea, E. Grech, M. Busuttil (J. Bonello 52’), J. Farrugia, M. Gauci, R. Alegria-Jimenez, N. Micallef, M. Camilleri, D. Galubovic (M. Mifsud 68’), D. Pirotta (F. Pellegrino 76’), R. Mercieca.
Referee: Daniel Portelli
Wara serje ta’ erba’ logħbiet mingħajr rebħa, Żebbuġ Rangers irritornaw għar-rebħ bl-aħjar mod possibli meta rebħu faċilment lil Marsa 5-0. L-iskor jagħti stampa ċara ta’ dak li seħħ fil-logħba li kienet għal kollox dominata mit-tim ta’ Winston Muscat.
Għal Marsa telfa oħra, is-sitt waħda tal-istaġun li tħallihom fil-post ta’ qabel l-aħħar fil-klassifika. Marsa lbieraħ kienu deludenti, fejn dehru bla saħħa fl-attakk u ferm vulnerabbli fid-difiża u jridu joqogħdu ferm attenti u jtejbu l-prestazzjonijiet tagħhom jekk iridu jevitaw ir-relegazzjoni.
Wara sitt minuti, Żebbuġ fetħu l-iskor b’azzjoni personali ta’ KOVACIC li qabeż għadd ta’ plejers u minn angolu magħluq għeleb lil Galea. Marsa ma wettqux reazzjoni u Żebbuġ amministraw tajjeb il-vantaġġ u fis-27 minuta skorjaw it-tieni gowl.
Azzjoni ta’ Larson Mallia fuq il-lemin u kross lejn ARILSON MELLO DA SILVA li mill-viċin xeħet fix-xibka. Żebbuġ komplew jattakkaw u lob ta’ Schembri kien salvat minn fuq il-linja minn difensur ta’ Marsa u mir-rebound ix-xutt ta’ Laros Mallia mar barra. Fid-39 minuta Mello Da Silva kellu tentattiv minn 30 metru bil-ballun ftit barra.
Disa’ minuti mill-ftuħ tat-tieni taqsima, Żebbuġ għalqu definitivament il-logħba meta KURT ZAMMIT daħal tajjeb u ħataf inċertezza tad-difiża u spara fix-xibka minn tarf il-kaxxa. L-azzjonijiet ta’ Żebbuġ komplew regolarment u fis-67 minuta skorjaw ir-raba’ gowl permezz ta’ STEVEN SCHEMBRI.
Żewġ minuti minn tmiem il-logħba Żebbuġ skorjaw ukoll il-ħames gowl permezz ta’ daqqa ta’ ras mill-viċin tas-sostitut LUKE GATT.
ŻEJTUN C. ……………….. 1
MQABBA …………………. 5
Żejtun: D. Zarb, K. Tanaka, Y. Camilleri, M. Ciantar (K. Spagnol 62’), C. Giordemaina (J. Galea 21’), B. Farrugia, A. Scozzese, E. Vella, L. De Melo (R. Cauchi 70’), P. Lapira, A. Carabott
Mqabba: J. Debono, N. Ojuola, M. Borg, G. Gesualdi (A. Scicluna 64’), B. Muscat, K. Cutajar, L. Vella Critien, R. Mandic, T. Trebovac (R. Tanti 21’), L. Micallef (S. Darmanin 69’), G. Micallef
Referee: Stefan Pace
B’ħamsa u erbgħin minuta maġiċi, Mqabba ġabu fix-xejn lil Żejtun Corinthians biex kisbu rebħa kbira u saħħew it-tielet post fil-klassifika fejn issa nhar l-Erbgħa jisfidaw lil Pietà li jinsabu fit-tieni post. Għal Mqabba din kienet il-ħames rebħa konsekuttiva u mingħajr dubju t-tim ta’ Clive Mizzi hu t-tim tal-mument.
Ħasra li tilfu lil Trebovac wara għoxrin minuta fejn dan il-plejer kien devastanti fil-ftit ħin li lagħab fejn skorja doppjetta u laqat ukoll il-lasta.
Bidu impressjonanti ta’ Mqabba li skorjaw darbtejn fl-ewwel sittax-il minuta fejn Tomislav Trebovac kien fi klassi għalih b’doppjetta u ftit wara laqat anki l-lasta. Wara sitt minuti azzjoni ta’ kontrattakk u mix-xellug TREBOVAC daħal tajjeb u b’lob preċiż għeleb lil Zarb.
Fis-16-il minuta kross ta’ Gianfranco Micallef mix-xellug u daqqa ta’ ras stupenda ta’ TREBOVAC ma tagħti l-ebda ċans lil Zarb isalva. Trebovac kien formidabbli u żewġ minuti wara, laqat il-wieqfa b’lob ieħor preċiż u ftit wara kellu xutt jaħbat man-naħa ta’ barra tax-xibka. Iżda f’din l-istess azzjoni Trebovac weġġa’ u kellu jinbidel.
Iżda Mqabba ma waqfux u fil-25 minuta għamluhom tlieta b’azzjoni ta’ kontrattakk ta’ GIANFRANCO MICALLEF li dar ma’ difensur u skorja b’xutt fil-baxx bi preċiżjoni kbira. Żejtun ippruvaw iwettqu reazzjoni iżda fl-40 minuta Mqabba ngħataw penalty meta De Melo mess il-ballun b’idu u mill-11-il metru kien MICHAEL BORG li xeħet fix-xibka.
Fil-50 minuta, Gianfranco Micallef ħadem ballun tajjeb u qassam lejn RENNIE TANTI li żamm il-ballun tajjeb u spara fix-xibka minn qagħda angolata. Tliet minuti wara Mqabba kellhom lil Luke Vella Critien imkeċċi, deċiżjoni pjuttost ħarxa.
Żejtun xeħtu kollox fl-attakk u kienu sfortunati fit-68 minuta meta daqqa ta’ ras ta’ Yessous Camilleri ħabtet ma’ sieq il-lasta. YESSOUS CAMILLERI rnexxielu jnaqqas l-iskor għal Żejtun fit-78 minuta b’daqqa ta’ ras mill-viċin. Fl-84 minuta anki Żejtun spiċċaw b’għaxra meta tkeċċa Emerson Vella li rritalja għal fawl ta’ Michael Borg.
Klassifika wara 11-il logħba: Qormi 26 punt, Pietà 24 punt, Mqabba 22 punt, Vittoriosa 18-il punt, Żejtun 17-il punt, Żebbuġ 17-il punt. 16-il punt, San Ġwann 14-il punt, Qrendi 13-il punt, Melita 10 punti, Żabbar SP 7 punti, Marsa 7 punti, Rabat 4 punti, Pembroke 4 punti
