L-aħbar li l-Vitals Health Care mhux se jibqa’ jopera l-isptarijiet Karin Grech, Saint Luke’s, u l-Isptar Ġenerali ta’ Għawdex, qed tqajjem aktar dubji u mistoqsijiet.
Iddikjara dan il-Partit Nazzjonalista li appella biex il-Gvern jieqaf jaħbi u jwieġeb għall-mistoqsijiet li qed isiru. Trasferiment tal-isptarijiet li qed isir wara biss sentejn mindu Vitals rebaħ konċessjoni dubjuża mingħand il-Gvern Malti u wara kuntratt iffirmat għal 30 sena.
Il-Partit Nazzjonalista bħan-nies qed jistaqsi:
1. Għaliex il-Vitals telqet minn Malta meta suppost kellha kuntratt għal 30 sena?
2. Jekk il-liġijiet Ewropej, li deħlin ftit ġranet oħra, u li jesiġu li s-sidien ta’ kumpaniji jkun magħruf min huma, biex jiġi evitat ħasil ta’ flus kienetx ir-raġuni veru li Vitals biegħu malajr il-konċessjoni lil Steward Healthcare System? Issa aktar minn qatt qabel jista’ l-Gvern jghid min huma s-sidien veri ta’ Vitals?
3. Jekk fl-għaġġla biex tiġi mibjugħa u trasferita l-konċessjoni minn Vitals Health Care għal Steward Healthcare System ġewx osservati l-proċeduri u r-regolamenti kollha ta’ public procurement?
4. Huwa minnu li l-Vitals ilhom li telqu minn Malta minn Marzu li għadda? Jekk iva ghaliex ma’ kien infurmat ħadd?
5. Kemm laħqu ħadu flus il-Vitals f’dawn is-sentejn li għamlu suppost imexxu l-isptarijiet?
6. La darba il-ftehim ma għadux fis-seħħ, il-Gvern lest jippublika il-kuntratt kollhu ma VGH mingħajr ħabi u ċ-ċensuri bil-linji suwed?
Il-Partit Nazzjonalista jinsab mħasseb b’ dan il-każ li ddikjarah bħala “xempju ta’ nuqqas ta’ trasparenza u nuqqas ta’ governanza tajba u “f’isem il-poplu Malti jeżiġi tweġibiet ċari u mingħajr ħabi. Fuq kollox qed tintalab assigurazzjoni li dan it-trasferiment mhux se jaffettwa ħażin lill-pazjenti u lilll-istaff.”
