Maltemp qalil fuq l-Italja u r-Renju Unit

L-Italja u r-Renju Unit huma fost il-pajjiżi Ewropej li bdew jinħakmu minn maltemp qalil li ġab miegħu xita, riħ qawwi kif ukoll temperaturi kesħin ħafna.

Fil-każ tar-Renju Unit, dan il-maltemp ġab ħafna borra, li ħarbtet it-trasport kemm mill-ajru kif ukoll mill-art. Bħala ajruporti, l-agħar li ntlaqat kien dak ta’ Stansted, li għal xi ħin ingħalaq, u ta’ Luton fejn kien hemm dewmien ta’ madwar siegħa għal xi titjiriet.
Fl-Italja, minħabba r-riħ qawwi li kien hemm, tħassru l-vjaġġi tal-vapuri lejn il-gżejjer partikolarment mill-kosta tar-reġjuni tal-Lazio u l-Campania. Għal xi bnadi, l-awtoritajiet Taljani ħarġu twissija ta’ xita u riħ qawwi.