Il-manager ta’ Manchester United Josè Mourinho qal li Zlatan Ibrahimovic se jdum barra mill-azzjoni għal xahar. L-attakkant ta’ 36 sena ma kienx fl-iskwadra finali fid-draw ta’ mingħajr gowls li Manchester United kellhom f’Old Trafford kontra Southampton ilbieraħ, wara li fost il-ġimgħa kien mibdul fil-ħin tal-mistrieħ kontra Burnley.
Wara l-partita tal-bieraħ, Mourinho kkonferma li l-eks internazzjonali Żvediż se jdum barra mill-azzjoni għal xahar minħabba li weġġa’ l-irkoppa. “Hi l-istess, problema kbira. Hu plejer ta’ 37 sena bi problemi bl-irkoppa. Zlatan hu xahar barra,” qal il-Portugiż. Ibrahimovic kien irritorna riċentament fit-tim ta’ Manchester United, wara li tilef l-ewwel nofs tal-istaġun filwaqt li kien qed jirkupra minn injury serja fl-irkoppa lura f’April.
F’daqqa waħda, United għandhom nuqqas ta’ għażliet fl-attakk, wara li Romelu Lukaku kellu jinbidel kmieni fl-aħħar logħba, wara ħabta ras ma’ ras u fl-assenza tiegħu United ma rnexxielhomx jinfdu lid-difiża organizzata ta’ Southampton biex niżlu fit-tielet post tal-klassifika.
