Il-holders Arsenal kienu eliminati mit-Tielet Rawnd tal-FA Cup wara li sfaw megħluba 4-2 minn Nottingham Forest. Kienu t-tim taċ-Championship li fetaħ l-iskor fl-20 b’Eric Lichaj jiskorja b’daqqa ta’ ras mill-qrib wara free-kick.
Arsenal wettqu reazzjoni immedjata u ġabu d-draw tliet minuti wara permezz ta’ Per Mertesacker li skorja mir-rebound wara li daqqa ta’ ras ta’ qabel ħabtet mal-wieqfa. Forest reġgħu minn fuq qabel tmiem l-ewwel taqsima, b’xutt sabiħ għar-rokna ta’ Eric Lichaj li ħalla lil Ospina jħares.
Nottingham Forest għamluhom 3-1 f’nofs it-tieni taqsima permezz ta’ penalty ta’ Ben Brereton wara fawl fil-kaxxa tad-difensur Rob Holding. Arsenal reġgħu daħlu fil-logħba fid-79 minuta permezz ta’ Danny Welbeck, li ħa vantaġġ minn żball tal-gowlkiper Jordan Smith.
Iżda Nottingham Forest ingħataw it-tieni penalty tal-logħba fil-85 minuta wara fawl fil-kaxxa ta’ Mathieu Debuchy. Mill-11-il metru Kieran Dowell għeleb lil Ospina b’xutt ċentrali, penalty li fil-verità kellu jerġa’ jingħata minħabba li Dowell żelaq max-xutt u mess il-ballun darbtejn b’saqajh.
Il-ġirien ta’ Arsenal, Tottenham kellhom bżonn tliet gowls fi spazju ta’ tmien minuti biex għelbu lil Wimbledon 3-0 f’Wembley Stadium. Huma fetħu l-iskor fit-63 minuta meta minn kross ta’ Sissoko, daħal tajjeb Harry Kane li għeleb lil George Long. Żewġ minuti wara, l-iskor sar 2-0 meta reġa’ kien Harry Kane li kompla għal ġewwa wara li xutt ta’ Kyle Walker Peters kien imxellef. It-tim ta’ Pochettino skorja t-tielet gowl fil-71 minuta b’xutt sabiħ fir-rokna ta’ Jan Vertonghen.
Tim ieħor minn Londra ddiżappunta wara li West Ham spiċċaw fi draw ta’ 0-0 kontra t-tim tal-League 1 Shrewsbury. B’dan ir-riżultat, West Ham jilagħbu r-replay fis-16 ta’ Jannar fl-Olympic Stadium.
Sorpriża oħra seħħet fil-logħba bejn Newport County u Leeds United, bit-tim tal-League 2 jegħleb lil Leeds. It-tim taċ-Championship kien fetaħ l-iskor permezz ta’ Gaetano Berardi wara disa’ minuti. Newport ġabu d-draw fis-76 minuta b’awto-gowl ta’ Conor Shaughnessy u skorjaw il-gowl tar-rebħa fid-89 minuta minn Shawn McCoulsky.
