Tfajla ta’ 30 sena qed issofri minn xi ġrieħi wara inċident li seħħ fi Triq Vjal Santa Luċija, hekk kif wieħed jaqbeż it-traffic lights fi tmiem Triq Aldo Moro, fil-Marsa.
Jirriżulta li għall-ħabta tal-erbgħa ta’ waranofsinhar seħħ impatt bejn vettura tat-tip BMW 120d misjuqa minn żagħżugħ ta’ 27 sena minn Ħaż-Żabbar, u Toyota Starlet tat-tfajla li hi residenti ż-Żejtun.
Mal-impatt, it-tfajla tilfet il-kontroll tal-vettura tagħha u spiċċat fi Triq l-Arkata, nofsha f’ditch li jdawwar ġibjun li jinsab fil-ġenb ta’ din it-triq.
Konsegwenza tal-inċident, it-tfajla kellha tittieħed l-Isptar Mater Dei għall-kura, filwaqt li għaddejjin l-investigazzjonijiet b’rabta ma’ dan l-inċident.
