Din is-sena fl-MFA Awards se jkun hemm unur speċjali dedikat għall-aqwa sapport. Dan l-unur għandu l-għan li jippremja l-isforzi tal-partitarji li b’mod kostanti juru l-lealtà u l-appoġġ lejn il-klabb tagħhom matul dan l-istaġun tal-Kampjonat BOV Premier kif ukoll il-BOOST Diesel FA Trophy.
Ir-rebbieħa tal-Best Fans Award se jintgħażel minn numru ta’ ġurnalisti li regolarment isegwu l-Kampjonat BOV Premier, u se jaraw il-kontribuzzjoni tagħhom. Huma se jagħżlu lista ta’ kandidati li imbagħad jingħataw il-punti bbażati fuq tliet kriterji. Dawn huma l-attendenza tagħhom matul l-istaġun, il-koreografija u l-imġieba tajba.
L-ewwel rebbieħa tal-Best Fans Awards jitħabbru waqt l-MFA Awards ta’ din is-sena. “Il-partitarji huma l-qalb u r-ruħ tal-futbol. Qed nintroduċu dan l-unur annwali bħala mod ta’ rikonoxximent lejn il-kontribuzzjoni tal-partitarji kif ukoll biex ninkoraġġuhom jgħollu l-livell ta’ sapport għat-tim tagħhom.”
“Aħna nittamaw li din l-inizjattiva tinċentiva lill-partitarji biex iżidu l-kulur u l-atmosfera dakinhar tal-logħba meta t-tim tagħhom qed jilgħab, jafu wkoll li l-isforzi tagħhom jistgħu jkunu premjati bħala l-aqwa partitarji f’Malta għall-istaġun 2017/2018,” qal il-Viċi President tal-MFA Matthew Paris li hu responsabbli mill-organizzazzjoni tal-MFA Awards.
Filwaqt li l-partitarji se jiksbu l-punti għall-attendenza, il-koreografija u l-imġieba tajba, taħt ir-regoli proposti għal dan l-unur, offiżi marbuta mal-partitarji huma suġġett ta’ azzjoni dixxiplinarja mill-Bord tal-Kontroll u d-Dixxiplina tal-MFA li jwassal fi tnaqqis ta’ punti.
