Il-klabb tal-Waterpolo Neptunes Leo Vegas ħabbar li Jovan Popovic inħatar il-kowċ il-ġdid tat-tim għall-istaġun li ġej. Popovic li hu mill-Montenegro fl-aħħar snin kien fis-settur tekniku tat-tim nazzjonali ta’ Georgia. L-ewwel esperjenza tiegħu kienet mat-tim taż-żgħażagħ, imbagħad inħatar kowċ tat-tim tal-kbar fejn kien strumentali biex fl-2014 u fl-2016 Georgia għaddew għall-fażi finali tal-Kampjonat Ewropew.
Popovic mistenni jasal f’Malta ftit ġimgħat biex jieħu t-tmexxija tat-tim. Hu se jkun qed jaħdem ma’ Nenad Navarin li se jkun responsabbli mill-iskwadri kollha taż-żgħar. Bħalissa Navarin qed imexxi lil Neptunes fl-Enemed Cup. Neptunes jilagħbu s-semifinali tal-play-off is-Sibt li ġej kontra San Ġiljan Tum Invest.
