KERĊEM A…….3
QRENDI…………4
It-tim tal-Ewwel Diviżjoni għadda mal-aħħar tmienja tal-FA Trophy għall-ewwel darba fl-istorja tiegħu wara li eliminaw lil Kerċem Ajx fil-ħin barrani, F’logħba li ntlagħbet fil-Kerċem Stadium.
Kienu Kerċem li fetħu l-iskor fid-29 minuta meta minn korner mil-lemin, Ognjen ROLOVIC għola tajjeb fuq it-tieni lasta u għeleb lil Julian Azzopardi b’daqqa ta’ ras.
It-tim Għawdxi rdoppja l-iskor fil-51 minuta meta reġa’ kien Ognjen ROLOVIC li rċieva ballun fit-tul wara d-difiża avversarja, evita l-ħarġa ta’ Julian Azzopardi u skorja f’lasta vojta.
Reazzjoni minn Qrendi li seba’ minuti wara naqsu d-distakk meta minn kross fil-baxx mix-xellug ta’ Dhonatan Santos da Hora, daħal tajjeb Julio Cesar MARTINS DA SILVA li għeleb lil Branko Vrndic.
Qrendi ġabu d-draw fl-64 minuta meta r-referee ordna penalty wara li Vrndic bil-ballun f’idu għolla siequ u laqat lil Aaron Agius, bir-referee jordna penalty u jkeċċi l-gowlkiper. Mill-11-il metru Dhonatan SANTOS DA HORA tefa’ l-gowlkiper in-naħa l-oħra.
It-tim ta’ Demis Scerri deher li seta’ jirbaħ il-logħba meta fl-74 minuta mar fil-vantaġġ għall-ewwel darba. Kien kross mil-lemin lejn Santos da Hora, ix-xutt mill-kaxxa ż-żgħira ġie salvat parzjalment, bil-ballun jispiċċa fid-direzzjoni ta’ Julio Cesar MARTINS DA SILVA li xeħet fix-xibka mill-viċin.
Iżda Kerċem ġabu d-draw seba’ minuti wara meta Milos PERISIC ħa vantaġġ minn żball difensiv u għeleb lil Julian Azzopardi b’xutt tajjeb fil-baxx mill-kaxxa, biex il-partita marret għall-ħin barrani.
Kien fil-110 minuta li Qrendi skorjaw il-gowl tar-rebħa b’xutt sabiħ ta’ Aaron AGIUS minn barra l-kaxxa li ma ta l-ebda ċans lill-gowlkiper avversarju biex isalva.
