Patrice Evra se jirritorna fil-Premier League Ingliż wara li kkonkluda l-ftehim ma’ West Ham b’kuntratt sa tmiem l-istaġun. Evra li għandu 36 sena wasal fil-kumpless sportiv ta’ West Ham dalgħodu qabel ma għadda mill-eżami mediku u ffirma kuntratt sa Ġunju ta’ din is-sena.
Rapporti fil-media Ingliża qalu li Everton kienu interessati fid-difensur Franċiż, iżda l-plejer għażel li jkompli l-karriera f’Londra. Evra se jkollu l-flokk numru 27 u jista’ jagħmel id-debutt kontra Watford fl-10 ta’ Frar fil-London Stadium.
“Ninsab kuntent li ningħaqad ma’ West Ham, li rritornajt fil-Premier League. Nirringrazzja lil West Ham li tawni din l-opportunità u tal-laqgħa li tawni,” qal Evra. Il-Franċiż lagħab ma’ Manchester United għal tmien snin u nofs inkluż l-istaġun 2013/2014 meta Manchester United kienu taħt it-tmexxija ta’David Moyes li fil-preżent hu l-manager ta’ West Ham.
Hu kien tkeċċa minn Olympique Marseille aktar kmieni dan l-istaġun u ġie sospiż mill-UEFA wara inċident ma’ partitarju. Is-sospensjoni li tintemm fit-30 ta’ Ġunju għandha x’taqsam biss ma’ tournaments tal-UEFA.
