Rapport: George Cassar
ST. ANDREWS……0
MOSTA………………0
St. Andrews: M. Calleja Cremona, J. Walker, M. Gauci, A. Borg, J. Vandelenoitte. J. Farrugia, M. Miranda Gomez, M. Davis (R. Martin 69’), D. Jackson, K. Reid, T. Azian
Mosta: A. Vella, R. Ekani, T. Veronese, D. Mansi, T. Farrugia, K. Magro, M. Sammartino, D. Xuereb, G. Trovade (J. Tanti 82’), E. Agyemang (Z. Brincat 82’), Leozinho
Imwissija: M. Miranda Gomez 35’, J. Farrugia 79’ (S), K. Magro 51’, M. Sammartino 86’, Z. Brincat 92’, R. Ekani 93’ (M)
Referee: Jude Amin Utulu
Assistenti Referees: Jurgen Spiteri, William Debattista
In-Nazzjon Plejer tal-logħba: Davide Mansi (Mosta)
Attendenza: 74
F’partita li ntlagħbet f’xita bla waqfien, Mosta u St. Andrews ma rnexxielhomx isibu x-xibka u ħadu punt kull wieħed. Il-kundizzjonijiet tat-temp għamluha diffiċli għaż-żewġ timijiet biex joħolqu xi ħaġa u l-punt miksub mit-tnejn kien wieħed ġust.
Fl-istess waqt iż-żewġ timijiet baqgħu ’l bogħod mit-telf hekk kif din kienet it-tielet logħba għal Mosta bla telfa u bla ma sofrew gowl, filwaqt li St. Andrews komplew bil-forma tajba taħt it-tmexxija ta’ Michael Woods hekk kif din tal-bieraħ kienet ir-raba’ partita konsekuttiva li ħarġu minnha mhux telliefa.
Mosta kellhom lit-Taljan Giordani Trovade li għamel id-debutt fuq in-naħa offensiva iżda ftit li xejn kellu ċ-ċans li juri x’jaf. L-aħjar għal Mosta kienu t-Taljani Davide Mansi fid-difiża u Massimo Sammartino f’nofs il-grawnd.
Għal St. Andrews kellu prestazzjoni tajba l-akkwist ta’ Jannar Jason Lee Vandelenoitte filwaqt li l-plejer tax-xahar ta’ Jannar Kemar Reid ma żammx il-forma tajba li kien fiha dan l-aħħar.
Wara żewġ minuti ix-xutt ta’ Martin Davis għal ftit ma ħasadx lill-gowlkiper Mosti Andreas Vella li iżda rnexxielu jdawwar f’korner.
Il-Mostin kienu l-iktar li resqu qrib il-gowl wara nofs siegħa meta minn azzjoni mibdija mill-ħabrieki Massimo Sammartino, il-gowlkiper Matthew Calleja Cremona ma żammx il-ballun. Warajh kien hemm Matthew Gauci li bl-intenzjoni li jtajjar il-ballun ixxuttja ġol-lasta tiegħu stess u laqat il-wieqfa.
Mas-siegħa logħob Leozinho rċieva pass fit-tul iżda meta ġie wiċċ imb wiċċ mal-gowlkiper ta’ St. Andrews, ikkrossja flok ixxuttja u ċ-ċans inħela.
Kwarta mit-tmiem, kien hemm tentattiv fuq kull naħa. Ix-xutt ta’ Degran Jackson għal St. Andrews għadda għoli. Ftit wara Dexter Xuereb għal Mosta nġieb f’pożizzjoni tajba iżda kellu l-ballun imtajjar minn saqajh minn Vandelannoite.
B’dan ir-riżultat Mosta telgħu żewġ punti biss taħt Ħamrun Spartans li se jilagħbu kontrihom fil-logħba li jmiss, filwaqt li St. Andrews imisshom żewġ konfronti diretti wara xulxin kontra Senglea Athletic u Naxxar Lions.
