Ifittxu għall-kawża u l-fdalijiet tal-vittmi tal-ajruplan Russu

Il-ħaddiema tas-salvataġġ Russi sabu madwar 200 parti tal-katavri ta’ dawk li kienu abbord l-ajruplan tas-Saratov Airlines li ġġarraf il-Ħadd f’għalqa barra l-kapitali, Moska.

Abbord l-ajruplan kien hemm 71 persuna.Abbord kien hemm ukoll tlett itfal, wieħed ta’ ħames snin, ieħor ta’ 13 u ieħor ta’ 15-il sena. Il-maġġoranza tal-passiġġieri kienu mir-reġjun ta’ Orenburg, fejn tinsab il-belt ta’ Orsk. Kien hemm ukoll persuna mill-Ażerbajġan u l-Iżvizzera.Intqal li kien se jkun hemm bżonn l-eżami tad-DNA biex jiġu identifikati l-vittmi.

Fl-istess ħin hemm mas-600 persuna li qed jagħmlu tfittxija fiz-zona fejn iġġarraf l-ajruplan, kemm biex jinġabru il-fdalijiet tal-persuni kif ukoll l-ajruplan.

X’wassal għal din it-traġedja mhux magħruf u l-uffiċjali Russi qalu li ma kienu qed jeskludu xejn.L-ajruplan għeb mir-radar ftit wara li telaq mill-ajruport ta’ Domodedovo, f’Moska. L-uffiċjali qalu li l-kaxex is-suwed tal-ajruplan kienu nstabu imma ma taw ebda ħjiel mill-ewwel indikazzjonijiet li taw.
Kien hemm rapporti li l-bdot ftit wara t-tluq kien qal li kien hemm ħsara abbord. Imma l-uffiċjali Russi qalu li dan ma kienx minnu. S’issa jidher li l-uffiċjali Russi qed jeskludu t-terroriżmu minn din it-traġedja. L-uffiċjali qalu li meta l-ajruplan iġġarraf mal-art kien għadu sħiħ, li jfisser li ma kien hemm l-ebda splużjoni fl-ajru.