Ix-xahar li għadda, Jannar, kien aktar imdawwal milli mistenni, b’aktar minn 169 siegħa ta’ xemx. L-ogħla temperatura tal-arja f’Jannar laħqet 19.2°C, filwaqt li l-aktar baxxa niżlet għal 7°C u bit-total ta’ xita mkejjela kienet 79.6mm anqas min-norma għal Jannar.
Dan joħroġ minn stqarrija mill-Uffiċċju meterjoloġiku fl-Ajruport Internazzjonali ta’ Malta. Skont l-istqarrija Jannar beda b’temperaturi kemxejn ogħla min-norma u ’l fuq minn sitt sigħat ta’ xemx aktar milli mistenni f’dan iż-żmien tas-sena.
Il-baħar kien aktar sħun ukoll, u żamm temperatura medja tal-wiċċ ta’ 16.5°C, meta normalment tkun ta’ 15.8°C f’dan iż-żmien tas-sena.
Filwaqt li l-gżejjer ma kinux neqsin mix-xemx, ix-xemx ma ħarġet xejn fil-15 ta’ Jannar. Fejn jidħol l-ammont ta’ xita, storja oħra. It-total ta’ xita li niżel f’Jannar ammonta għal biss 13.3mm, jiġifieri 79.6mm anqas milli mistenni f’dan iż-żmien tas-sena. Fil-fatt, Jannar kien l-aktar xahar xott li esperjenzaw il-gżejjer Maltin f’dan l-aħħar deċennju.
Jannar kien ukoll ikkaratterizzat minn ħafna riħ, b’veloċità medja ta’ 11.1 mil tal-baħar minflok id-9.2, kif normalment ikun irreġistrat.
