Fi stqarrija, il-Forum Unions Maltin (FOR.U.M.) qal li kien qed jistenna li l-Kummissjoni għad-Drittijiet tal-Persuni b’Diżabbiltà (CRPD) tidentifika rwol ta’ katalista ħalli tressaq lejn xulxin lill-Union tal-Għalliema (MUT) u l-MCAST fis-soluzzjoni bejniethom fl-interess taż-żewġ naħat, partikolarment meta fl-Iskola jattendu wkoll numru ta’ Studenti bi bżonnijiet soċjali.
Il-FOR.U.M. jemmen li s-CRPD kellha tieħu dan il-pass minflok ma tieħu lill-MUT fil-Qorti. Dan b’diżappunt għad-dritt li l-unions għandhom biex jieħdu azzjonijiet industrijali minflok ma jkunu mhedda mill-Qorti meta jgħaddu mill-proċess propju stabbilit mill-Att dwar l-Impjiegi u r-Relazzjonijiet Industrijali.
Il-FOR.U.M. qal li l-azzjonijiet fil-Qorti bħal dawk tas-CRPD fil-konfront tal-MUT ma jgħinux biex is-sitwazzjoni tissolva, anzi jtawwluha aktar għad-detriment taż-żewġ naħat, li issa se jdumu aktar biex jaslu għal soluzzjoni.
Fil-każ tal-MCAST, huma l-Għalliema u l-Istudenti li qed ibatu, tant li hi tal-mistħija kif istituzzjoni edukattiva bħal dik tuża’ tattiċi biex l-impjegati tagħha ma jkollhomx l-għodda li tistħoqqilhom, temmet tgħid l-istqarrija.
Is-CRPD twieġeb għall-istqarrija tal-FOR.U.M.
Dwar dan, is-CRPD wieġbet fi stqarrija li hi ddiżappuntata kif spiċċat fil-mira ta’ attakk mill-FOR.U.M. sagħtejn biss wara li rtirat l-azzjonijiet legali kontra l-MUT b’sinjal ta’ rieda tajba mal-Union tal-Għalliema u mal-Gvern.
Fil-fatt, iċċarat li l-azzjoni legali kienet fil-konfront taż-żewġ naħat minħabba li l-azzjonijiet industrijali wasslu biex intlaqtu l-Istudenti b’diżabbiltà li jattendu l-Helen Keller Resource Centre.
Is-CRPD qalet li ma kien ikollha l-ebda intenzjoni tieħu azzjonijiet legali li kieku l-Gvern u l-MUT solvew il-kwistjonijiet ta’ bejniethom u b’hekk, ma kien ibati ħadd. Barra minhekk, il-Kummissjoni qalet li hi marbuta bil-Liġi għall-Opportunitajiet Indaqs li tiddefendi d-drittijiet tal-persuni b’diżabbiltà.
Is-CRPD tenniet li l-FOR.U.M. u l-MUT iridu jifhmu li d-dritt tal-azzjonijiet industrijali m’għandu qatt isir għall-ebda dannu tal-persuni b’diżabbiltà. Dan hekk kif nuqqas ta’ terapija li suppost jingħata fil-Helen Keller Resource Centre jista’ jwassal għal aktar problemi ta’ saħħa ta’ dawk li għandhom bżonnha.
L-MUT tgħid li ngħatat raġun
U min-naħa tagħha, l-MUT qalet fi stqarrija li ngħatat raġun dwar il-kwistjoni fil-Helen Keller Resource Centre. Fl-istess waqt innotat kif is-CRPD m’għandhiex dritt twaqqaf lill-MUT milli sejjaħ azzjonijiet industrijali leġittimi.
L-MUT qalet li issa tistenna risposti adekwati dwar min se jkun qed jagħmel it-testijiet meħtieġa biex dan iċ-Ċentru jerġa’ jkun ta’ servizz għal min għandu bżonnu. B’hekk, l-MUT issa mistennija tirrevedi l-pożizzjoni tagħha ħalli l-azzjonijiet industrijali jerġgħu jidħlu fis-seħħ, kif tipprovdi l-Liġi tax-Xogħol, u b’hekk ikunu protetti l-membri tal-Union.
