Persuni li tkellmu ma’ NETnews.com.mt ilmentaw li l-iskola tal-mużika ta’ Għawdex ilha mill-bidu tas-sena skolastika mingħajr għalliem tal-vjolin.
Ix-Xewkija Visual and Performing Arts hija l-unika skola tat-tip tagħha, u taqa’ taħt id-direzzjoni tal-Gvern. Il-persuni li tkellmu ma’ dan is-sit ilmentaw li l-aħħar lezzjonijiet tal-vjolin saru f’Ġunju tas-sena li għaddiet, jiġifieri sa tmiem is-sena skolastika preċedenti.
Minn informazzjoni li għandu NETnews, l-iskola ilha numru ta’ snin timpjega għalliema tal-vjolin, iżda issa hu maħsub li dawn l-għalliema ġew trasferiti f’Malta mingħajr ma sar sforz biex għalliema ġodda jimlew il-post battal minnhom.
Fost oħrajn tkellem ma’ NETnews Paul Cassar mir-Rabat, Għawdex, li spjega li għalkemm it-tfal u l-istudenti jitgħallmu strumenti oħra, huwa ta’ dispjaċir li għadu ma sar xejn biex jitkompla t-tagħlim tal-vjolin.
‘The Gozo Visual and Performing Arts School’ fix-Xewkija fetħet f’Ottubru tal-2014 u toffri lezzjonijiet f’erba’ dipartimenti differenti: l-arti, il-mużika, id-drama u ż-żfin.
