L-HSBC Malta hu l-ewwel bank f’Malta li qed iniedi teknoloġija biometrika għall-konvenjenza ta’ dawk il-klijenti kollha li għandhom iPhone 5s jew ogħla. B’din il-funzjoni l-ġdida, il-klijenti issa jistgħu jibbenefikaw minn Touch ID biex jiksbu aċċess aktar veloċi u aktar faċli għall-kontijiet tagħhom permezz tal-HSBC mobile app tagħhom. Fi stqarrija l-HSBC qalu li biex tiċċelebra l-introduzzjoni ta’ din l-innovazzjoni, il-klijenti li jaċċessaw l-iOS jew l-Android HSBC mobile app sas-17 ta’ Marzu 2018 se jkollhom iċ-ċans li jirbħu iPhone X jew iPhone 8.
It-Touch ID tuża marki tas-swaba rikonoxxuti minflok passwords (il-klijenti tal-iPhone X jistgħu jużaw FaceID), hi veloċi u faċli biex tkun installata. Is-servizz issa hu disponibbli għall-utenti kollha tal-HSBC mobile banking fuq l-iPhone, kif ukoll għall-klijenti kummerċjali li jużaw l-HSBCnet mobile app.
It-tnedija tat-teknoloġija biometrika għall-klijenti tal-HSBC hi appoġġata minn sejbiet riċenti f’riċerka onlajn dwar il-konsumatur minn YouGov, li hi ditta li tagħmel riċerka internazzjonali tas-suq permezz tal-internet u analiżi tad-dejta, liema ditta għandha l-kwartieri ġenerali tagħha fir-Renju Unit.
Din ir-riċerka tiżvela li aktar minn terz (37%) tal-konsumaturi jaqblu li passwords tradizzjonali saru miżura antikwata ta’ sigurtà. Ir-riċerka YouGov żvelat ukoll li aktar minn terz (38%) tan-nies għandhom it-tendenza li jużaw l-istess password għall-parti l-kbira tal-kontijiet onlajn tagħhom, filwaqt li aktar minn nofshom (55%) qalu li rarament jaġġornaw il-passwords tagħhom. Ir-rapport ta’ YouGov, li jismu “Apps in Banking”, sar fuq bażi internazzjonali.
Daniel Robinson, il-Kap tar-Retail Banking and Wealth Management ta’ HSBC Malta, qal: “Il-klijenti tagħna qed jużaw dejjem aktar il-mobiles tagħhom kemm biex jaċċessaw l-informazzjoni dwar il-kont tagħhom, kif ukoll biex jinnegozjaw. It-tnedija tat-Touch ID tirrappreżenta pass importanti lejn il-faċilità ta’ banking biometriku, u se tgħin biex il-benefiċċji ta’ servizzi bankarji permezz tal-mobile jkunu aktar siguri u konvenjenti għall-klijenti tagħna. Aħna kburin li qed inkunu l-ewwel bank f’Malta li nniedu din il-funzjonalità.”
Bħala parti mill-kampanja Touch ID, tliet klijenti li jidħlu fil-mobile banking app permezz tat-Touch ID matul il-perjodu tal-kampanja se jintgħażlu biex jieħdu sehem fi kwizz sempliċi biex jirbħu jew iPhone X wieħed, inkella wieħed minn żewġ iPhone 8.
Aktar tagħrif dwar l-innovazzjonijiet bankarji tal-HSBC Malta jista’ jinkiseb minn hsbc.com.mt jew permezz tan-numru tat-telefon 2380 2380.
